Izraeli synon shtetëzimin më të madh arkeologjik në Bregun Perëndimor prej 180 ha
Nga OraNews Përditësimi i fundit 21 Nëntor 2025, 14:44
Izraeli ka shpallur planin për të shtetëzuar rreth 180 hektarë tokë në sitin arkeologjik të Sebastias në Bregun e pushtuar Perëndimor, duke shënuar sekuestrimin më të madh të një zone me rëndësi historike. Grupi “Peace Now” paralajmëron se ky veprim vjen në një kohë rritjeje të dhunës së kolonëve dhe përpjekjeve për zgjerim të vendbanimeve ilegale.
Izraeli planifikon të marrë nën kontroll një pjesë të madhe të sitit historik romak në Sebastia, në Bregun e pushtuar Perëndimor, duke e shndërruar këtë në sekuestrimin më të madh të një zone me rëndësi arkeologjike.
Sipas një dokumenti qeveritar të publikuar së fundmi, Administrata Civile izraelite synon të marrë rreth 180 hektarë tokë, ndërkohë që grupi “Peace Now” paralajmëron se kjo përbën një tjetër akt të grabitjes së tokave palestineze. Banorëve palestinezë u janë lënë vetëm 14 ditë afat për të paraqitur kundërshtimet e tyre.
Gazeta Haaretz raporton se qëllimi i konfiskimit është zhvillimi i sitit të Sebastias si atraksion turistik, projekt për të cilin Izraeli ka miratuar mbi 30 milionë shekelë.
Në zonë, sipas organizatave të të drejtave të njeriut, kanë nisur tashmë gërmime dhe punime infrastrukturore, ndërsa Sebastia mbetet një nga vendet me vlerë të lartë historike, i lidhur me Mbretërinë e lashtë të Samarisë dhe me figurën e Gjon Pagëzorit.
Lëvizja e fundit vjen në një klimë të thelluar tensionesh në Bregun Perëndimor, ku kolonët izraelitë kanë ngritur brenda natës një tjetër vendbanim ilegal, pranë Betlehemit.
Sipas burimeve lokale, gjatë ditës së premte janë regjistruar një sërë sulmesh nga kolonët, që kanë djegur prona dhe sulmuar civilë palestinezë, me ndërhyrjen e vonuar të forcave izraelite.
Organizata Human Rights Watch ka deklaruar ndërkohë se Izraeli mund të ketë kryer krime lufte gjatë dëbimit me forcë të mijëra palestinezëve nga kampet e refugjatëve në Bregun Perëndimor gjatë këtij viti.
Situata mbetet tensionuar dhe nën monitorim nga organizatat ndërkombëtare të të drejtave të njeriut.
