Zbulohet shkaku i vdekjes së aktores Diane Keaton. Mikesha e saj: E pashë dy ose tre javë më parë dhe ishte...
Nga OraNews Përditësimi i fundit 16 Tetor 2025, 12:59
Aktorja e njohur, Diane Keaton, ndërroi jetë më 11 tetor në moshën 79-vjeçare, si pasojë e pneumonisë, konfirmoi familja e saj për revistën People.
Familja shprehu mirënjohje për mesazhet e dashurisë dhe mbështetjes që morën dhe sugjeroi që çdo donacion në kujtim të saj të bëhej për banka ushqimore lokale ose strehë për kafshë, pasi Keaton ishte e apasionuar pas kafshëve dhe e përkushtuar ndaj komunitetit të pastrehë.
Shëndeti i aktores ishte përkeqësuar papritur në muajt e fundit, duke i shqetësuar miqtë dhe familjen, ndërsa ajo e kishte mbajtur të fshehtë gjendjen.
Ndryshime të tjera në jetën e saj, si shitja papritmas e “shtëpisë së ëndrrave” në Los Angeles për 29 milionë dollarë, treguan se diçka po ndodhte në jetën personale.
Keaton, e njohur për shëtitjet e përditshme me qenin e saj, Reggie, nuk ishte parë në publik për muaj të tërë. Postimi i fundit në “Instagram” në prill tregonte një Diane të lumtur dhe të shëndetshme.
Në aspektin personal, Keaton nuk u martua kurrë, por pati lidhje me Al Pacino për rreth dy dekada si dhe me regjisorin Woody Allen dhe aktorin Warren Beatty.
Së fundmi, kompozitorja fituese e cmimit Grammy Carole Bayer Sager, mikeshë e ngushtë e Keaton, foli për gjendjen e aktores së famshme përpara se ajo të ndërronte jetë. “E pashë dy ose tre javë më parë dhe ishte shumë e dobët. Kishte humbur shumë peshë”, rrëfeu Sager.
Keaton e kishte kaluar pjesën e mbetur të vitit në Palm Springs pas dëmtimeve që pati shtëpia e saj nga zjarret e janarit në Los Angeles. Ajo e përshkroi Diane si një dritë magjike për të gjithë, si një njeri që rrezonte lumturi dhe optimizëm.
