Dita e dytë e vonesave në aeroportet evropiane pas sulmit kibernetik
Nga OraNews Përditësimi i fundit 21 Shtator 2025, 15:18
Pasagjerët në disa aeroporte evropiane vazhduan të përballen sot me vonesa, pasi një sulm kibernetik preku një ofrues shërbimesh për sistemet e hipjes në bord.
”Aeroportet në Berlin, Bruksel, Dublin dhe Londër raportuan të shtunën probleme me trajtimin e pasagjerëve për shkak të problemeve të IT-së”, tha organizata e kontrollit të trafikut ajror Eurocontrol.
Aeroporti ”Heathrow” i Londrës dhe aeroporti ”Berlin-Brandenburg” (BER), i cili i shërben kryeqytetit gjerman, thanë se kompania amerikane ”Collins Aerospace” u prek nga sulmi kibernetik.
Në një deklaratë, aeroporti BER u tha udhëtarëve se ”duhet të vazhdojnë të presin kohë më të gjata pritjeje dhe vonesa të mundshme”.
“Ne u kërkojmë të gjithë pasagjerëve të jenë sa më të përgatitur të jetë e mundur. Aeroporti BER, së bashku me linjat ajrore dhe ofruesit e shërbimeve tokësore, po bën çdo përpjekje për të mbajtur ndërprerjet në minimum”, tha aeroporti.
Ai shtoi se ”operacionet në terminale po ecnin pa probleme” dhe i këshilloi pasagjerët ”të kryenin regjistrimin në internet ose në pikat e vetëshërbimit në aeroport”.
Të shtunën, katër ulje dhe tetë nisje u anuluan në aeroport.
Shumë të tjerë u përballën me vonesa, me stafin e aeroportit që përdori lista letre dhe stilolapsa në vend të kompjuterëve për të kryer procedurat e regjistrimit.
Të paktën 10 fluturime nga aeroporti i Brukselit u anuluan dhe 17 të tjera u vonuan me më shumë se një orë të shtunën, me radhë të gjata në regjistrim.
