Tani quajeni Braut Haaland/ Emri i ri do të jetë në fanelën e Norvegjisë!...
Nga OraNews Përditësimi i fundit 27 Gusht 2025, 15:11
Një kapitull i ri fillon për Erling Haaland dhe Norvegjinë. Ylli i Manchester City ka vendosur të shtojë edhe mbiemrin e nënës së tij në fanelën e tij, duke e ndryshuar nga "Haaland" në "Braut Haaland". Fanela e re është tashmë në shitje me sloganin: "Një kapitull i ri për Norvegjinë".
Qendërsulmuesi do të debutojë me emrin e tij të ri më 4 shtator në një ndeshje miqësore kundër Finlandës, përpara se të përballet me Moldavinë në kualifikueset e Kupës së Botës 2026 (në të njëjtin grup me Italinë).
Gjenerata e re e lojtarëve norvegjezë, e udhëhequr nga Haaland, Odegaard, Nusa dhe Sorloth, synon ta rikthejë ekipin kombëtar në një Kupë Bote pas gati tridhjetë vitesh: paraqitja e tyre e fundit ishte në Francë 1998, kur skandinavët u eliminuan 1-0 nga Azzurrët në raundin e 16-të.
Vendimi i Haalandit e habiti edhe trajnerin Ståle Solbakken: "Ky është emri i tij (Braut), nuk dija asgjë për të deri tani, por nuk do të jetë e komplikuar", tha ai me shaka.
57-vjeçari do të jetë në gjendje të mbështetet te Haaland për ndeshjet e ardhshme, me ekipin që tashmë kryeson Grupin I kualifikues përpara Italisë, Izraelit, Estonisë dhe Moldavisë me 12 pikë, rezultat i katër fitoreve në katër ndeshje.
Nuk është ende e qartë nëse ndryshimi i emrit do të miratohet edhe te Manchester City, por ky veprim shënon simbolikisht fillimin e një epoke të re për sulmuesin norvegjez me ekipin e tij kombëtar: Braut Haaland është gati të udhëheqë rikthimin e Norvegjisë në skenën botërore.
