Shtëpia e Bardhë: Presidenti Trump do të zgjasë afatin e ndalimit të TikTok në SHBA
Nga OraNews Përditësimi i fundit 18 Qershor 2025, 12:31
TikTok do të vazhdojë të ekzistojë për të paktën tre muaj të tjerë në Shtetet e Bashkuara, pasi Presidenti Donald Trump është gati të zgjasë një afat për shitjen ose ndalimin e tij për herë të tretë që nga marrja e detyrës këtë vit.
"Presidenti Trump do të nënshkruajë një Urdhër Ekzekutiv shtesë këtë javë për të mbajtur TikTok-un në funksionim", tha të martën Sekretarja e Shtypit e Shtëpisë së Bardhë, Karoline Leavitt.
Aplikacioni i famshëm supozohej të ndalohej në SHBA pasi pronari i tij kinez, ByteDance, refuzoi t'ia shiste atë një blerësi amerikan brenda afatit të janarit. Leavitt tha se zgjatja 90-ditore do të "siguronte që kjo marrëveshje të mbyllet në mënyrë që populli amerikan të mund të vazhdojë të përdorë TikTok me sigurinë se të dhënat e tyre janë të sigurta dhe të mbrojtura". Përpara njoftimit të Leavitt, Trump i tha BBC-së se ndoshta do ta zgjaste afatin e TikTok.
"Ndoshta do të na duhet të marrim miratimin e Kinës," tha Trump. "Mendoj se do ta marrim. Mendoj se Presidenti Xi në fund të fundit do ta miratojë."
Kur u pyet nëse kishte bazë ligjore për të zgjatur afatin, ai u përgjigj: “Po”. Zgjatja e Trump është në kundërshtim me vullnetin e Kongresit, i cili miratoi masën "shitje ose ndalim" vitin e kaluar. Paraardhësi i tij, ish-Presidenti Joe Biden, e nënshkroi menjëherë projektligjin duke e kthyer në ligj. Ligji kishte për qëllim të adresonte shqetësimet se TikTok, i cili ka 170 milionë përdorues amerikanë, mund të përdoret nga Kina si një mjet për spiunazh dhe manipulim politik. Gjykata e Lartë u pajtua me një gjykatë më të ulët dhe e mbështeti ligjin në janar, pak para se Trump të merrte detyrën.
Platforma u mbyll shkurtimisht për disa orë gjatë fundjavës para inaugurimit të Trump. TikTok e vlerësoi Trumpin për shpëtimin e platformës pasi ajo u bë përsëri e disponueshme. Trump u përpoq të detyronte shitjen e TikTok te një blerës amerikan në vitin 2020, gjatë mandatit të tij të parë në detyrë. Por vitin e kaluar, Trump tha se i pëlqente platforma sepse besonte se e kishte ndihmuar të fitonte zgjedhjet presidenciale të vitit 2024.
"Kam një vend të ngrohtë në zemrën time për TikTok-un, sepse fitova të rinjtë me 34 pikë", tha Trump në dhjetor, megjithëse shumica e votuesve të rinj mbështetën kandidaten demokrate Kamala Harris.
Zgjatjet e njëanshme të afatit nga ana e Trump kanë bërë që disa analistë të hedhin poshtë idenë se një ndalim mund të ndodhë ndonjëherë gjatë kohës së tij në detyrë. Administrata Trump tha në prill se SHBA-të dhe Kina ishin afër një marrëveshjeje që do ta kishte vendosur kontrollin e shumicës së operacioneve të TikTok në SHBA nën pronësinë amerikane. Kjo marrëveshje ende nuk është materializuar.
Trump ka thënë se do të ishte i hapur ta shihte atë të shitet te gjiganti i cloud computing Oracle, bashkëthemeluesi i të cilit Larry Ellison është një aleat i hershëm i Trump. Miliarderi Frank McCourt, biznesmeni kanadez Kevin O'Leary dhe bashkëthemeluesi i Reddit, Alexis Ohanian, janë pjesë e një ekipi tjetër që po ofron ofertën për platformën. Dhe YouTuberi më i madh në botë, Jimmy Donaldson - i njohur edhe si MrBeast - ka thënë se është gjithashtu i interesuar të blejë TikTok si pjesë e një grupi tjetër investitorësh.
