Qindra media dhe organizata kërkojnë qasje për gazetarët e huaj në Gaza
Nga OraNews Përditësimi i fundit 5 Qershor 2025, 21:29
Më shumë se 130 organizata për të drejtat e medias dhe gazetarëve i bënë thirrje Izraelit t’i japë shtypit ndërkombëtar akses “të menjëhershëm dhe të pakufizuar” në Rripin e Gazës, i cili është ndaluar të raportojë te korrespondentët e huaj, me disa përjashtime, që nga 7 tetori 2023.
“Për 20 muaj, autoritetet izraelite u kanë mohuar gazetarëve jashtë Gazës aksesin e pavarur në Territoret Palestineze, një situatë e paprecedentë në historinë moderne të konfliktit të armatosur”, thanë nënshkruesit e kësaj letre, të koordinuar nga ”Reporterët pa Kufij” (RSF) dhe Komiteti për Mbrojtjen e Gazetarëve (CPJ) me seli në Nju Jork.
“Gazetarët vendas, ata që janë më të përshtatshëm për të raportuar të vërtetën, por janë në rrezik të mërgimit dhe urisë. Deri më sot, gati 200 gazetarë janë vrarë nga ushtria izraelite. Shumë të tjerë janë plagosur dhe përballen me kërcënime të vazhdueshme me vdekje për shkak se bëjnë punën e tyre: dhënien e dëshmisë”, vazhdon letra, e nënshkruar nga Phil Chetwynd, drejtor i agjencisë së lajmeve AFP, Julie Pace, drejtoreshë e ”Associated Press” dhe Aluf Benn, drejtor i të përditshmes izraelite ”Haaretz”.
Pas sulmeve të përgjakshme të 7 tetorit 2023 nga lëvizja islamiste palestineze Hamas, Izraeli nisi një ofensivë ushtarake në Rripin e Gazës, e cila ka shkaktuar dhjetëra mijëra viktima dhe shkatërrime masive në territorin palestinez.
Pas më shumë se dy muajsh e gjysmë bllokadë, Izraeli ka lejuar përsëri një numër të kufizuar kamionësh të Kombeve të Bashkuara të hyjnë në Gaza që nga 19 maji. Kjo e fundit flet për një “pikë uji në oqean” të nevojave të rreth 2,4 milionë banorëve të kërcënuar nga uria.
