Barça mund të penalizohet në Champions, për shkelje të Fair Play Financiar të UEFA-s
Nga OraNews Përditësimi i fundit 4 Qershor 2025, 13:01
Barcelona përballet me një ndalim në Champions League të ardhshme për shkelje të rregullave financiare të UEFA-s për të dytin vit radhazi, raporton The Times.
Chelsea dhe Aston Villa gjithashtu mund të përballen me sanksione, por në rastin e tyre, do të jetë një dënim më i lehtë sepse është shkelja e tyre e parë.
Sipas The Times, ndëshkimi me të cilin përballet Barça mund të përfshijë regjistrimin e një skuadre më të vogël, që do të thotë një kufizim në numrin e lojtarëve që mund të regjistrojnë në garë, ose një humbje pikësh sezonin e ardhshëm.
Në tetor, Barcelona humbi një apel në Gjykatën e Arbitrazhit Sportiv (CAS) për një gjobë prej 500.000 eurosh për keqraportim të fitimeve të saj. CAS tha në atë kohë se dënimi ishte i lehtë, por e paralajmëroi Barcelonën se një shkelje e dytë do të rezultonte në sanksione më të ashpra .
“CFCB (Bordi i Kontrollit Financiar të Klubit) thekson se një shkelje e ngjashme nga klubi në procesin e monitorimit për sezonin 2023-24 do të përbënte një rast të shkeljes së përsëritur dhe një masë më e rëndë disiplinore do të konsiderohej për FC Barcelona”, thuhej në vendimin e CAS.
Kjo shkelje e dytë ka mbërritur, sipas The Times. UEFA do të raportojë detajet e ekipeve që nuk i kanë përmbushur rregullat financiare në javët në vijim.
