Auckland FC, i vetmi klub në botë në krye të ligës së tij, por që nuk mund të luajë në asnjë Ligë Kampionësh…
Nga OraNews Përditësimi i fundit 13 Maj 2025, 10:38
ZELANDA E RE - I vendosur në veri të Zelandës së Re, Auckland FC përfundoi i pari në sezonin e rregullt të kampionatit australian...
Ende në gjysmëfinale të play-off-eve, kundër Melbourne Victory, klubi neozelandez nuk do të jetë në gjendje të luajë asnjë ndeshje në Ligën e Kampionëve të Azisë ose të Oqeanisë sezonin e ardhshëm.
I themeluar në vitin 2024, klubi iu bashkua A-League sezonin e kaluar pas një vendimi të Ligës Australiane të Futbollit për të zgjeruar ligën e saj.
Ky konfigurim i paparë ka çuar në disa situata të papritura. Për shembull, klubi i Perthit, i vendosur në bregun perëndimor të Australisë, duhej të udhëtonte më shumë se 5.300 km për të luajtur një ndeshje në Auckland.
Australia është anëtare e Konfederatës Aziatike të Futbollit (AFC), ndërsa Zelanda e Re është anëtare e Konfederatës së Futbollit të Oqeanisë (OFC).
Si një klub i Zelandës së Re që luan në kampionatin australian, Auckland FC e gjen veten të bllokuar.
AFC-ja nuk i njeh klubet e Zelandës së Re si të lidhura me të. Në vitin 2020, Wellington Phoenix përfundoi i 3-ti në sezonin e rregullt, por vendi i tyre për në play-off të Ligës së Kampionëve të AFC iu dha Brisbane Roar, i cili u rendit i 4-ti.
Auckland FC gjithashtu i privuar nga Kupa e Botës për Klube
Përveç Ligës së Kampionëve të AFC-së, Auckland FC nuk mund të garojë as në Ligën e Kampionëve të OFC-së. Kjo është e rezervuar për ekipet më të mira në Ligën e Zelandës së Re, e cila nuk është profesionale.
Megjithatë, Auckland FC, ashtu si Phoenix, fitoi statusin professional, duke iu bashkuar me kampionatin australian dhe për këtë arsye nuk është më i kualifikuar për Ligën e Kampionëve të Oqeanisë.
Përveç se nuk janë në gjendje të konkurrojnë kundër ekipeve më të mira kontinentale, dy klubet e Zelandës së Re janë gjithashtu të privuara nga Kupa e Botës për Klube, qasja në të cilën përcaktohet nga performanca në Ligën e Kampionëve.
