Tensione gjatë marshimit “PRO” Palestinës në Milano

Nga OraNews Përditësimi i fundit 13 Prill 2025, 13:23

Rreth 10 mijë protestues marshuan për të kërkuar ndalimin e asaj që ata e quajnë “gjenocid në Gaza” dhe për të shprehur mbështetje për rezistencën palestineze.

Protesta nisi nga Sheshi “Duka d’Aosta” dhe përfundoi në Harkun e Paqes, duke kaluar nëpër lagjen Isola, pasi autoritetet kishin ndaluar hyrjen në sheshin historik të "Duomo"-s.

Gjatë marshimit, pati dëmtime në vitrina bankash, supermarkete dhe lokale të ndryshme, si dhe mbishkrime politike në muret e ndërtesave.

Përplasjet me policinë nisën në Piazzale Baiamonti dhe Piazzale Lagosta, kur disa protestues u përpoqën të ndalonin ndalimin e një vajze nga policia.

Aktivistët hodhën shishe dhe fishekzjarrë, duke shkaktuar tension dhe ndërhyrje të forcave të rendit në pajisje anti-protestë. Shtatë persona u ndaluan, ndërsa në shesh u formua edhe një barrikadë që kërkonte lirimin e tyre.

Një episod i rëndë që ndezi reagime të ashpra politike ishte shkrimi “Spara a Giorgia” në një vitrinë banke, një kërcënim i drejtpërdrejtë ndaj kryeministres Giorgia Meloni.

Zyrtarë të lartë si Antonio Tajani, Matteo Salvini, Matteo Renzi dhe Lorenzo Fontana dënuan ngjarjet dhe shprehën solidaritet me Melonin dhe forcat e rendit, duke e quajtur incidentin “të papranueshëm” dhe “kërcënim për demokracinë”.

Protestuesit mbanin flamuj palestinezë dhe pankarta me akuza ndaj liderëve politikë italianë si Elly Schlein dhe Carlo Calenda, të etiketuar si “bashkëfajtorë të gjenocidit”, duke reflektuar një klimë gjithnjë e më të tensionuar politike dhe shoqërore.