Shirat e rrëmbyeshëm përkeqësojnë gjendjen pas tërmetit në Mianmar
Nga OraNews Përditësimi i fundit 8 Prill 2025, 19:04
Pasojat e tërmetit shkatërrues që goditi Mianmarin më 28 mars po përshkallëzohen tragjikisht nga shira të rrëmbyeshëm që kanë mbuluar vendin, duke thelluar krizën humanitare dhe duke ekspozuar mijëra njerëz të zhvendosur ndaj kushteve të rënda të jetesës dhe kërcënimeve serioze shëndetësore.
Sipas Jagat Patnaik, Shef i Rajonit të Azisë për organizatën humanitare ActionAid, situata është alarmante:
“Mijëra persona që kanë humbur shtëpitë po flenë jashtë ose në strehime të improvizuara, me vetëm çarçafë plastikë për t’u mbrojtur nga shiu,” deklaroi ai.
Në shumë zona, njerëzit janë të detyruar të kthehen në ndërtesa të dëmtuara për të kërkuar strehim, duke rrezikuar jetën e tyre nga kolapsi i mundshëm i strukturave.
Situata më shqetësuese paraqitet në rajonin e Liqenit Inle, ku shtëpitë janë shembur në ujë dhe banorët janë detyruar të jetojnë në varka. Ekipet humanitare lokale kanë raportuar skena tronditëse:
“Rreth 600 njerëz ndajnë një tualet të vetëm në një manastir,” thuhet në raportin e ActionAid.
Rritja e sëmundjeve të transmetuara nga uji si kolera dhe diarreja, për shkak të mungesës së kanalizimeve, po përbën një kërcënim serioz për jetën e të mbijetuarve, sidomos fëmijëve dhe të moshuarve.
“Strehëzat prej bambuje nuk i rezistojnë shiut” – kërkesë për ndihmë të menjëhershme
Sipas Aung Min Naing, drejtoreshë e programit në organizatën Future Light Youth Development, shiu i dendur po i bën të papërdorshme strehëzat e ndërtuara pas tërmetit:
“Janë ndërtuar për t’i mbrojtur njerëzit nga nxehtësia, jo nga shirat e furishëm. Situata është bërë e pamenaxhueshme.”
Organizatat humanitare i kanë bërë apel komunitetit ndërkombëtar për ndërhyrje të menjëhershme, me qëllim përmirësimin e kushteve të higjienës dhe sigurimin e strehimit të qëndrueshëm, përpara se shpërthimi i mundshëm i epidemive ta kthejë situatën në një katastrofë të pakontrollueshme.
