Ministrit Çeku sërish i refuzohet vizita në Preshevë

Nga OraNews Përditësimi i fundit 26 Mars 2025, 20:44

Ministrit të Kulturës, Rinisë dhe Sportit, Hajrulla Çeku i është refuzuar sërish vizita në Luginën e Preshevës.

Kjo është bërë e ditur nga kryetarja e Preshvës, Ardita Sinani e cila tha se diskriminimi ndaj shqiptarëve po vazhdon.

Presheva, Medvegja dhe Bujanoci janë tri komuna të banuara me shumicë shqiptare në jug të Serbisë.

“Për herë të dytë, pushteti i Vuçiqit ndalon Ministrin Hajrulla Çeku të vizitojë Preshevën. Ky është një tjetër akt i politikës nacionaliste serbe, e cila fshihet pas një fasade pro-evropiane, por në realitet ushqen një regjim autoritar që shkel të drejtat e njeriut dhe të minoriteteve”, shkroi Sinani të mërkurën në Facebook.

Sinani tha se Presheva është e vendosur të mbajë lidhjet me të gjitha vendbanimet shqiptare si dhe të forcojë bashkëpunimin me Kosovën dhe Shqipërinë.

“Fatkeqësisht, ky regjim [i Serbisë] vazhdon të përkëdhelet nga Perëndimi për arsye gjeostrategjike, ndërsa shqiptarët e Luginës përballen me diskriminim dhe izolim. Por ne nuk ndalemi”, tha Sinani.