Ushtria izraelite arreston bashkëregjisorin palestinez të filmit “No Other Land”
Nga OraNews Përditësimi i fundit 24 Mars 2025, 22:14
Ushtarët izraelitë arrestuan Hamdan Ballal, regjisorin e ”No Other Land”, i cili fitoi një Oscar për dokumentarin më të mirë.
Gazeta e përditshme ”Haaretz” raporton se dhjetëra kolonë në Bregun Perëndimor sulmuan Ballalin, duke e plagosur atë dhe njerëz të tjerë.
”Regjisori më pas u fut në një ambulancë për trajtim, por kur ushtarët izraelitë arritën, ata e nxorrën jashtë dhe e arrestuan”, raporton ”Haaretz”.
Yuval Abraham, bashkëregjisor i ”No Other Land”, shkroi në X se Ballal ishte “linçuar” dhe kishte lëndime në kokë dhe stomak. Abraham shtoi se ende nuk është e qartë se ku ndodhet apo nëse po merr trajtim mjekësor.
Burimet palestineze të cituara nga ”Times of Israel” raportuan se kolonët mbërritën këtë mbrëmje pranë fshatit Susya, në Bregun jugor Perëndimor, dhe hodhën gurë mbi banorët, makinat dhe shtëpitë.
Sipas policisë, palestinezët janë kundërpërgjigjur duke hedhur gurë drejt tyre.
Dëshmitarët okularë raportuan se katër palestinezë u plagosën nga gurët, shumica prej tyre lehtë, ndërsa policia tha se tre palestinezë u arrestuan.
Mes të arrestuarve, sipas një dëshmitari okular, është edhe Hamdan Ballal.
”Arrestimi i Hamdan Ballal nga IDF konfirmon se Izraeli qeveriset nga një bandë kriminelësh, të cilët përveç bombardimit të spitaleve, kampeve të refugjatëve dhe shkollave, arrestojnë edhe njerëz të kulturës. Izraeli ka shkatërruar Gazën, ka vrarë 50 000 civilë dhe tani arreston kineastët: qëllimi është t’u mbyllë gojën atyre që dokumentojnë krimet e Izraelit”, tha Angelo Bonelli, bashkëzëdhënës i ”Europa Verde” dhe deputet i ”Alleanza Verdi e Sinistra”.
”Ajo që po bën Netanyahu është e patolerueshme: ky është një krim kundër njerëzimit, një gjenocid që po ndodh me pëlqimin e heshtur të Evropës dhe Italisë. Sanksionet kundër Izraelit janë një akt i domosdoshëm dhe i duhur dhe standardet e dyfishta të shumë liderëve evropianë janë të neveritshme”, theksoi ai.
