Gruaja me një sëmundje të rrallë të trurit kërcen me bashkëshortin për herë të parë pas shumë vitesh

Nga OraNews Përditësimi i fundit 24 Shkurt 2025, 10:57

Constance Bartholomew, 69-vjeçare, e cila vuan nga paraliza supranukleare progresive (PSP), një çrregullim i rrallë neurologjik që prek lëvizjen dhe të folurin, ndau një kërcim emocional me bashkëshortin e saj, Dennis, 72 vjeç, për herë të parë pas shumë vitesh.

PSP, që prek rreth 4000 njerëz në Mbretërinë e Bashkuar, e ka bërë të vështirë për Constance të ecë. Ajo filloi fizioterapinë në St Christopher's Hospice në Sydenham, Londër, shtatorin e kaluar, ku Dennis, me shaka, tha se do të paguante një milion paund për të kërcyer sërish me të. I frymëzuar nga fjalët e tij, rehabilituesja Ralitsa Angelova, punoi për ta bërë të mundur këtë dëshirë.

Katër muaj më vonë, Constance dhe Dennis kërcyen ngadalë nën tingujt e këngës Thinking Out Loud të Ed Sheeran, duke u lëkundur së bashku në një moment të ndjerë. Ralitsa e inkurajoi Constance të praktikonte lëvizjet, duke i ndërtuar besimin. “Ishte një moment besimi, dashurie dhe kujdesi mes tyre,” tha ajo.

Gruaja me një sëmundje të rrallë të trurit kërcen

Çifti u takua 51 vjet më parë në Blackfriars Road dhe kanë dy fëmijë e disa nipër e mbesa. Constance ishte aktive deri shtatë vite më parë, kur filloi të përjetonte marramendje dhe lodhje. Pas shumë vizitave në spital, mjekët i diagnostikuan PSP-në, duke dyshuar fillimisht për Parkinson.

Dennis kujtoi sesi ndryshoi shkrimi i saj dhe sesi, në një moment, kishte frikë se ajo po vdiste. “Ajo nuk mund të ecë, të artikulojë fjalët, shikimi i është dobësuar. Është një sëmundje e tmerrshme. Por kujtesa dhe të kuptuarit e saj mbeten të mprehta,” tha ai.

Vendosja e Constance në St Christopher’s ishte një vendim i vështirë, por Dennis tani sheh ndikimin pozitiv. “Ka qenë një periudhë fantastike. Ne mbështesim njëri-tjetrin, falë St Christopher’s.”

Videoja e vallëzimit të tyre është ndarë si pjesë e fushatës This is Hospice Care, e cila thekson rolin e azileve dhe rëndësinë e donacioneve testamentare. Vitin e kaluar, mbi 3500 njerëz në Londër përfituan nga kujdesi falas i azileve.

Tom Abbott, drejtor i gjenerimit të të ardhurave në St Christopher’s, tha: “Vallëzimi i Dennis dhe Constance tregon se sa shumë mund të bëjmë falë dhuratave në testament.” / Talker News - Syri.net