Kryeministri sllovak i bën thirrje Elon Muskut të zbulojë ndikimin politik të USAID-it

Nga OraNews Përditësimi i fundit 12 Shkurt 2025, 12:22

Kryeministri sllovak, Robert Fico, i ka kërkuar miliarderit amerikan Elon Musk, i cili drejton Departamentin e Efiçencës Qeveritare në administratën Trump, të japë informacion mbi mënyrën se si fondet e agjencisë kryesore amerikane të ndihmës (USAID) janë përdorur për të "deformuar sistemin politik" në Sllovaki me qëllim "favorizimin e partive të caktuara politike."

Fico, një nacionalist i majtë, dhe kabineti i tij janë përballur me një valë protestash javët e fundit, të cilat kryeministri i ka përshkruar si përpjekje të opozitës liberale pro-europiane për ta rrëzuar qeverinë e tij të zgjedhur në mënyrë demokratike me ndihmën e organizatave joqeveritare të financuara nga jashtë.

Në një letër drejtuar Musk-ut, kryeministri sllovak deklaroi se "është e padiskutueshme që burimet financiare nga USAID janë përdorur në Sllovaki për qëllime politike."

"Edhe nga burimet publike të paplota është e qartë se USAID ka mbështetur këto entitete me subvencione që arrijnë në disa milionë dollarë brenda një periudhe relativisht të shkurtër."

Fico i kërkoi Musk të sigurojë informacion mbi grantet e dhëna për "organizatat joqeveritare, mediat dhe gazetarë individualë aktivë në territorin e Republikës Sllovake" në mënyrë që të "dallohen projektet e dobishme dhe të vlefshme nga ndërhyrja e hapur në punët e brendshme të Sllovakisë."

Letra e tij vjen pas njoftimit të administratës së re të Donald Trump se do të shpërbëjë USAID-in. Agjencia qeveritare ka pasur si përgjegjësi kryesore menaxhimin e programeve të ndihmës së huaj, por është ekspozuar si një mjet për përhapjen e progresizmit globalist jashtë vendit dhe për përpjekje për të minuar qeveritë e zgjedhura që nuk janë të pëlqyera nga Uashingtoni.

Administrata e re ka ndërprerë pothuajse të gjitha financimet për agjencinë. Sekretari i Shtetit, Marco Rubio, deklaroi se qeveria amerikane do të vazhdojë të ofrojë ndihmë të huaj, "por ajo do të jetë një ndihmë e huaj që ka kuptim dhe që është e përshtatur me interesin tonë kombëtar."

Qeveria e Ficos ka qenë në shënjestër të elitave liberale të BE-së për shkak të politikës së saj të jashtme sovraniste dhe kritike ndaj BE-së, qëndrimit të ashpër kundër imigracionit dhe refuzimit të ideologjive të ashtuquajtura "woke".

Opozita ka organizuar protesta kundër qeverisë që nga vizita e Ficos në Moskë në dhjetor, duke akuzuar kryeministrin se po e zhvendos politikën e jashtme të vendit drejt Rusisë. Por Fico këmbëngul se dëshiron të ketë një marrëdhënie pragmatike me të gjitha fuqitë globale dhe se politika e tij e jashtme mbetet e përcaktuar nga anëtarësia në BE dhe NATO.

Opozita po përpiqet të përfitojë nga mosmarrëveshjet e brendshme mes dy partnerëve të vegjël në koalicionin trepartiak të Ficos, gjë që ka dobësuar qeverinë. Kryeministri po përpiqet me ngulm të mbajë kabinetin e tij të bashkuar për të shmangur zgjedhjet e parakohshme.

Sondazhet e opinionit nuk tregojnë një pakënaqësi të madhe me qeverinë, pasi mbështetja për partitë në pushtet dhe ato opozitare ka mbetur pothuajse e pandryshuar që nga zgjedhjet e fundit.

Letra e Ficos erdhi pas komenteve të aleatit dhe fqinjit të tij, kryeministrit hungarez Viktor Orban, i cili javën e kaluar tha se do të ndërmerrte hapa për të siguruar transparencën e fondeve të ndihmës që vijnë nga Shtetet e Bashkuara për OJQ-të dhe mediat kritike ndaj qeverisë, duke deklaruar se ka ardhur koha për të "eliminuar këto rrjete të huaja."