Thirrje për më shumë masa sigurie pas sulmit me thikë në një shkollë në Zagreb
Nga OraNews Përditësimi i fundit 22 Dhjetor 2024, 15:02
Mësuesit dhe prindërit dënuan mungesën e sigurisë në shkollat në Kroaci, një ditë pas një sulmi me thikë në kryeqytetin kroat Zagreb, ku u vra një 7-vjeçar dhe u plagosën katër të tjerë.
Ata kanë kërkuar një angazhim më të madh për të garantuar sigurinë e nxënësve dhe stafit, duke përfshirë vendosjen e rojeve në shkolla.
Mëngjesin e së premtes, një 19-vjeçar hyri në shkollën fillore Precko dhe sulmoi me thikë pesë persona, duke u plagosur para se të arrestohej.
“Të plagosurit, përfshirë një mësuese që u përpoq të ndalonte sulmuesin, janë në gjendje stabile dhe po trajtohen në spitale të ndryshme të Zagrebit”, thanë zyrtarët shëndetësorë.
Këshilli i prindërve të shkollës ku ndodhi sulmi tha dje se incidenti kishte ekspozuar defekte thelbësore në sistemin ekzistues.
Kryeministri Andrej Plenkovic tha të premten në mbrëmje se do të vendoseshin brava në hyrje të shkollave për të siguruar që një incident i tillë të mos përsëritej
Por për mësuesit, sindikatat e mësuesve dhe prindërit kjo nuk ishte e mjaftueshme. Plenkovic tha se nuk kishte asnjë motiv ideologjik pas sulmit.
“Me shumë gjasa ka ndodhur për shkak të çrregullimit shëndetësor të të riut që kreu këtë akt”, tha ai.
Ministri i Brendshëm, Davor Bozinovic tha të premten se i dyshuari, 19 vjeç dhe një ish-nxënës në shkollë, kishte një histori të çrregullimeve mendore.
Tre sindikata në sektorin e arsimit kanë bërë thirrje për një marshim të heshtur në qendër të Zagrebit të hënën me temën e sigurisë në shkolla.
Prindërit kanë planifikuar protesta më 7 janar, kur shkollat do të rihapen pas pushimeve.
Që nga mbrëmja e së premtes banorët kanë ndezur qirinj dhe kanë lënë mesazhe ngushëllimi pranë shkollës ku ndodhi sulmi.
Ministria e Arsimit tha dje se ishte ngritur një ekip prej 15 personash për të ndihmuar fëmijët, prindërit dhe mësuesit për të kapërcyer traumën
