Motivet e pasura në portat e Rehovës
Nga OraNews Përditësimi i fundit 30 Korrik 2024, 08:04
Në fshatin piktoresk të Rehovës, përveç arkitekturës së veçantë të shtëpive, karakteristike janë edhe portat e gdhendura me mjeshtëri nga artizanë të talentuar.
Ato pasqyrojnë një harmoni perfekte midis artit dhe funksionalitetit.
Në një pjesë të madhe të tyre, shtëpitë e Rehovës ruajnë karakteristikat e punimit nga mjeshtrat rehovarë si dhe kohën kur janë ndërtuar, që daton në fillimet e shekullit XX.
Çdo motiv dhe ornament mbart një histori dhe simbolikë të veçantë, duke na rikujtuar rëndësinë e Trashëgimisë sonë Kulturore.
Fshati i Rehovës ka një potencial të madh për të zhvilluar agroturizmin.
Fshati që dikur shquhej për zanatçinjtë e tij, si mjeshtra gurgdhendës tashmë vlerësohet për artizanatin, mikpritjen, gatimet e veçanta, bukuritë dhe trashëgiminë e pasur, të ruajtur deri në ditët e sotme.
