Erdogan: Turqia është afër përfundimit të ofensivës në Irak dhe Siri
Nga OraNews Përditësimi i fundit 13 Korrik 2024, 22:19
Presidenti turk Recep Tayyip Erdogan tha sot se Ankaraja është afër realizimit të qëllimeve të saj në operacionet e saj të vazhdueshme ushtarake kundër luftëtarëve kurdë në Irakun fqinj dhe veriun e Sirisë.
Deklaratat e Erdoganit vijnë një ditë pasi Ministria Turke e Mbrojtjes njoftoi se një ushtar ishte vrarë dhe një tjetër ishte plagosur në Irakun verior pas shpërthimit të një mjeti shpërthyes të improvizuar – ndërsa akuzoi “grupin separatist” për incidentin.
Turqia shpesh e përdor këtë term për t’iu referuar Partisë së ndaluar të Punëtorëve të Kurdistanit (PKK). Turqia, SHBA-ja dhe BE-ja gjithashtu e klasifikojnë PKK-në si një grup terrorist.
“Ne do të përfundojmë shumë shpejt mbylljen e zonës së operacionit Claw-Lock në Irakun verior”, u tha Erdogan të diplomuarve të akademisë ushtarake në Stamboll.
Erdogan po i referohej ofensivës së Turqisë të nisur në prill të vitit 2022 – e cila synon të shmangë sulmet e PKK-së nga veriu i Irakut.
Turqia ka rënë dakord më herët me qeverinë në Bagdad për të bashkëpunuar në shënjestrimin e luftëtarëve të PKK-së në Irak – ku grupi është i vendosur.
“PKK tani është “plotësisht e bllokuar” si në Irak ashtu edhe në Siri”, tha Erdogan.
Turqia ka kryer ofensiva tokësore në veri të Sirisë për të larguar milicinë kurde nga kufiri i saj që nga viti 2016. Ajo kontrollon një pjesë të zonës.
Erdogan, së fundmi iu referua planeve për një afrim me presidentin sirian Bashar al-Assad.
Presidenti turk është nën presionin e brendshëm lidhur me mbi 3 milionë refugjatë sirianë në Turqi.
“Ankaraja është e vendosur të mos lejojë asnjë strukturë që mund të përbëjë kërcënim për vendin përgjatë kufijve të Irakut dhe Sirisë”, shtoi Erdogan.
