Arrestohet turisti nga Kazakistani në Pompei, shkroi në murin antik fjalët “Ali”
Nga OraNews Përditësimi i fundit 24 Qershor 2024, 18:09
Një turist nga Kazakistani u ndalua nga punonjësit e sigurisë teksa po gdhendte shkronjat ‘Ali’ në një mur antik në Parkun Arkeologjik të Pompeit.
Turisti u raportua në karabinierët dhe do të merret në pyetje për çdo dëmtim të shkaktuar. Ndërkohë, ekspertët e trashëgimisë kulturore po vlerësojnë dëmin që ka pësuar suvaja antike dhe nëse mund të rikthehet në gjendjen e mëparshme.
Drejtori i parkut arkeologjik tha se turisti do të duhet të paguajë për çdo restaurim të murit dhe shifra pritet të jetë e madhe.
Kjo për shkak se riparimi i objekteve antike kërkon materiale të kushtueshme dhe ekspertë ndërkombëtarë që njohin metodën e ndërtimit të disa mijëra viteve më parë.
Muri që u dëmtua është zbuluar midis 1913 dhe 1914 dhe cilësohet si një nga modelet e rralla të shtëpive të Shekullit të II para Krishtit.
