A mund të ketë rikthim të sulmeve mes Tel Avivit dhe Teheranit? Bombardimet izraelite vrasin një tjetër zyrtar iranian në Siri
Nga OraNews Përditësimi i fundit 5 Qershor 2024, 00:56
Sulmet ajrore izraelite pranë qytetit sirian të Aleppos vranë një këshilltar ushtarak iranian, raportuan mediat iraniane, dy muaj pasi Lindja e Mesme ishte në prag të një lufte të madhe, pasi Izraeli dhe Irani u angazhuan në sulme të drejtpërdrejta të paprecedenta në tokën e njëri-tjetrit.
Saeed Abiyar, një këshilltar i Korpusit të Gardës Revolucionare Islamike të Iranit (IRGC) në Siri, vdiq në sulm, njoftoi agjencia iraniane e lajmeve Tasnim.
Agjencia shtetërore siriane e lajmeve SANA tha se incidenti ndodhi rreth orës 12:20 të mëngjesit me orën lokale të hënën, pasi Izraeli nisi një sulm ajror me raketa, duke synuar “një numër objektivash” në afërsi të Alepos.
Abiyar është anëtari i parë i IRGC që raportohet i vrarë nga Izraeli që nga prilli, kur Izraeli dyshohet se ka bombarduar kompleksin e ambasadës iraniane në Damask , duke vrarë disa komandantë.
Republika Islamike iu kundërpërgjigj atij sulmi duke lëshuar një breshëri dronësh dhe raketash drejt Izraelit, shumica e të cilave u rrëzuan.
Irani ka vendosur këshilltarë ushtarakë në Siri në mbështetje të presidentit sirian Bashar al-Assad që kur shpërtheu lufta civile atje në vitin 2011. Izraeli besohet se ka nisur disa sulme ndaj objektivave iraniane dhe të Hezbollahut në Siri vitet e fundit, veçanërisht që nga fillimi i luftës me Hamasin në Gaza.
