EMRI/ 45-vjeçari ther dy persona në Gjirokastër, arrestohet
Nga OraNews Përditësimi i fundit 21 Maj 2024, 10:56
Gjatë një konflikti të çastit, plagosi me mjet prerës (thikë) 2 shtetas, kapet dhe vihet në pranga 45-vjeçari.
Policia thotë se për ngjarjen u arrestua në flagrancë shtetasi Erjon Kola për veprat penale "Plagosja e rëndë me dashje" dhe "Prodhimi, mbajtja, blerja apo shitja pa leje e armëve të ftohta".
“Menjëherë pas njoftimit, mbrëmjen e djeshme, për një konflikt ndërmjet 3 shtetasve, Seksioni për Hetimin e Krimeve të Rënda i DVP Gjirokastër nisi hetimet për të nxjerrë përpara përgjegjësisë penale shtetasin/t përgjegjës, si dhe për zbardhjen e rrethanave të këtij konflikti.
Si rezultat, u kap dhe u vu në pranga shtetasi E. K., 45 vjeç, i cili dyshohet se gjatë një konflikti të çastit, për motive të dobëta, ka dëmtuar me mjet prerës (thikë), shtetasit E. B., 40 vjeç dhe F. D., 37 vjeç, të cilët janë në kujdesin e mjekëve dhe jashtë rrezikut për jetën.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme, për veprat penale “Plagosja e rëndë me dashje” dhe "Prodhimi, mbajtja, blerja apo shitja pa leje e armëve të ftohta"”, njofton policia.
