VIDEO/ Shembet kompleksi i pallateve në Belgorod, 7 të vdekur dhe mbi 15 të plagosur

Nga OraNews Përditësimi i fundit 12 Maj 2024, 16:36

Të paktën shtatë persona u vranë dhe 15 të tjerë u plagosën kur një pjesë e tërë e një ndërtese shumëkatëshe u shemb pasi u godit nga një raketë ukrainase në qytetin rus të Belgorod, pranë kufirit me Ukrainën, thanë zyrtarët rusë.

Pamjet e skenës së shembjes të postuara nga guvernatori i provincës ruse me të njëjtin emër, Vyacheslav Gladkov, tregojnë se të paktën 10 kate të ndërtesës janë shembur.

“Qyteti dhe provinca e Belgorodit janë objektiva të granatimeve masive nga forcat e armatosura ukrainase,” tha Gladkov.

“Si pasojë e goditjes direkte të kompleksit të banesave të marra nga një predhë, është shembur e gjithë fasada e objektit nga kati i dhjetë deri në katin e parë”.

Kanali i lajmeve në gjuhën ruse Mash në aplikacionin e mesazheve Telegram raportoi se të paktën shtatë persona u vranë dhe 15 u plagosën. Nuk ishte menjëherë e qartë se çfarë lloj armësh u përdorën në sulm ose nëse ato ishin me origjinë perëndimore.

Një dëshmitar okular në vendngjarje ka deklaruar se në vendngjarje kanë shkuar disa autoambulanca dhe zjarrfikëse.

“Një pjesë e tërë e ndërtesës 10-katëshe u shemb,” tha dëshmitari për Reuters në kushte anonimiteti. “Unë shoh mjaft viktima. Zjarrfikësit po hetojnë rrënojat”.