3 të vdekur nga përplasja e një autobusi me një kamion në Bolivi
Nga OraNews Përditësimi i fundit 18 Janar 2024, 06:59
Tre persona u vranë dhe 29 u plagosën pasi një autobus pasagjerësh u përplas me një kamion mallrash në një autostradë që lidh departamentet perëndimore të Bolivisë La Paz dhe Oruro, tha policia.
Shumë nga të plagosurit u dërguan në spitale të ndryshme në qytetet Patacamaya dhe El Alto, u tha gazetarëve shefi i policisë rurale dhe kufitare Miguel Hidalgo.
“Shoferët dhe disa pasagjerë janë lënduar rëndë, jemi në pritje të raportit mjekësor”, tha Hidalgo.
Sipas raporteve paraprake, të dyja automjetet po udhëtonin në të njëjtën korsi kur u përplasën dhunshëm “si pasojë e pakujdesisë së njërit prej shoferëve” pranë Patacamaya, në Departamentin e La Paz.
Banorët e Patacamaya u mobilizuan shpejt për të ndihmuar të mbijetuarit që dolën nga dritaret e autobusit.
