Anthony Hopkins u uron fansave Gëzuar Vitin e ri, ka një mesazh edhe për “pijanecët” e festave!
Nga OraNews Përditësimi i fundit 30 Dhjetor 2023, 18:01
Ylli 85-vjeçar i kinematografisë botërore, Anthony Hopkins, i ka uruar të gjithëve vitin e ri, por gjatë urimit iu drejtua “pijanecëve” të festave, duke treguar se prej 48 vitesh është i kujdesshëm me alkoolin.
“Përshëndetje. Gëzuar Vitin e Ri për të gjithë ju. Kënaquni të gjithë ju argëtues dhe pijetarë! Gëzuar Vitin e Ri, kalofshi bukur. Sot, 48 vjet më parë, hoqa dorë nga alkooli. Mora ndihmë për këtë dhe jeta ime ndryshoi. Unë nuk jam xheloz që ju jeni atje jashtë duke u argëtuar”, tha ai dhe më pas inkurajoi njerëzit që luftojnë me varësinë për të kërkuar ndihmë.
Hopkins ka folur sërish për varësinë që ka pasur me alkoolin. Në vitin 2020, ai i tha New York Times për vendimin për të hequr dorë nga pija në vitin 1975. “Mendova, “Epo, duhet ta ndaloj këtë sepse ose do të vras dikë ose do të vras veten”. Jeta ime, që nga ai moment, mori një kuptim të ri”, thotë Hopkins.
Dhe në vitin 2021, ai pranoi në revistën Sunday Times se “Alkoolistët Anonimë e kishin shpëtuar”. Pas një incidenti kur ai pinte shumë, ai mori pjesë në një mbledhje të tyre, për të cilën tha: “Unë nuk kam pirë [që atëherë] dhe nuk e kam ndjerë nevojën. Kur kërkova ndihmë dhe kuptova se nuk isha vetëm, se kishte mijëra njerëz si unë, të gjitha frikërat e mia filluan të largoheshin.”
View this post on Instagram
