Hetimet për incineratorin e Tiranës, 3 persona në arrati, ndërsa 2 u kapën në kufi, njëri duke dalë e tjetri duke hyrë në Shqipëri

Nga Edison Vatnikaj Përditësimi i fundit 9 Dhjetor 2023, 11:05

“Ora News” zbardh detaje te reja nga operacioni i prokurorisë së Posaçme i zhvilluar një ditë më parë.

Burime bëjnë me dije se për tre persona nuk është ekzekutuar urdhër-arresti.

Bëhet fjalë për Klodian Zoton, Mirel Mërtirin, dhe Erjon Muratajn.

Pjesa tjetër janë ekzekutuar urdhrat e ndalimit.

Po ashtu dy ndalime janë kryer në Rinas.

Një shtetas që sapo ka hyrë në territorin e Republikës së Shqipërisë dhe tjetri duke tentuar të dalë nga vendi.

Reagimi i deputetes së PD-së

Për deputeten e Partisë Demokratike Ina Zhupa arrestimet e SPAK për inceneratorin e Tiranës janë lajm i mirë, edhe pse sipas saj janë vetëm nisja e arrestimeve që do çoj te kokat e vërteta të aferës.

“I bëj thirrje SPAK të hetojë inceneratorin e Tiranës, duke përfshirë dhe kryeministrin Rama, i cili është personi që ka firmosur kontratën.

“Ligji detyron që tenderi zgjat 52 ditë, ndërsa për qeverinë Rama vetëm 16 ditë. Duke bërë kështu shkeljen e parë për Inceneratorin e Tiranës. Vallë këta punonjësit bashkiak e bënë këtë shkelje ligjore?! Sigurisht që jo

Por pse u bë kjo shkelje? Sepse fituesi ishte paracaktuar dhe ishte Mirel Mërtiri, i cili nuk është i panjohur por që kishte marrë dhe dy inceneratorët e tjerë, atë të Elbasanit dhe Fierit përmes të afërmve  të tij.

I madh e i vogël e kupton që Bashkia Tiranë nuk do futej në aferë 430 milion euro vetëm me vullnetin e disa punonjësve bashkiak.

Kjo skemë nuk kishte si të mos përfshinte dhe kryetarin e Bashkisë së Tiranës, Erion Veliajn.

Shkresa për të marrë mendim i është dërguar të 5-tave bashkive të qarkut Tiranë.

Në vend që shkresa t’i dërgohej Këshillit Bashkiak, Erion Veliaj nuk e kalon në Këshillin Bashkiak, e firmos vetë për të dhënë pohimin për inceneratorin e Tiranës. Jo vetëm që anashkalon Këshillin Bashkiak, por vendos edhe për 4 bashkitë e tjera të qarkurt Tiranë.

Pse e bën ai këtë shkelje, pse Erion Veliaj ka shkelur ligjin? Kjo është një pyetje të cilës duhet t’i përgjigjet SPAK, ku duhet të zbulojë dhe rolin e Erion Veliajt në këtë aferë dhe pse e ka shkelur ligjin, çfarë përfitimesh ka pasur.

SPAK ka detyrimin që t’i lidhë zyrtarët, siç janë të lidhur me njëri-tjetrin, si një grup i strukturuar kriminal, me në krye kryetarin e qeverisë, Edi Rama dhe kryetarin e bashkisë Erion Veliaj.

Çdo përpjekje për t’i copëzuar synon mbrojtjen e tyre nga kjo akuzë e tmerrshme dhe reale dhe nuk ndihmon në nxjerrjen para drejtësisë të atyre që kanë vjedhur qindra miliona euro nga taksat e qytetarëve”, shprehet përmes rrjeteve sociale deputetja Ina Zhupa.