OKB: Mbi 20 000 të arrestuar në Rusi për protestat kundër luftës

Nga OraNews Përditësimi i fundit 22 Shtator 2023, 13:13

Më shumë se 20 000 persona janë arrestuar në Rusi për pjesëmarrje në demonstrata paqësore kundër luftës që nga pushtimi i Ukrainës fqinje, sipas një eksperti të OKB-së, Mariana Katzarova.

Ka pasur më shumë se 600 akuza për “aktivitete kundër luftës”, raportoi sot Katzarova gjatë debatit mbi situatën në Rusi në Këshillin e OKB-së për të Drejtat e Njeriut, në Gjenevë.

Ekspertja përmendi Oleg Orlovin nga organizata e të drejtave të njeriut “Memorial”, i cili është në mesin e të akuzuarve dhe përballet me 15 vjet burg. “Memorial” iu dha Çmimi Nobel për Paqe një vit më parë.

“Të drejtat e njeriut janë kufizuar gjithnjë e më shumë në Rusi prej vitesh”, tha Katzarova në një raport të paraqitur në fillim të kësaj jave.

Ajo tha se Moska e ka intensifikuar goditjen e saj që nga pushtimi i Ukrainës në shkurt të vitit 2022.

Këshilli i OKB-së emëroi Katzarova në vitin 2022 si të dërguarën speciale për situatën e të drejtave të njeriut në Rusi, por Moska nuk e njeh mandatin e saj dhe nuk lejohet të udhëtojë në vend.

Qeveria ruse hoqi dorë gjithashtu nga e drejta e saj për të komentuar raportin e Katzarova në Këshillin e të Drejtave të Njeriut.