Të ardhurat nga tatimi mbi fitimin, 29.3 miliardë lekë

Nga OraNews Përditësimi i fundit 26 Qershor 2023, 13:54

Të ardhurat e mbledhura nga tatimi mbi fitimin u realizuan në masën 29.3 miliardë lekë.

Ministria e Financave dhe Ekonomisë bëri të ditur të ardhurat nga ky zë, rezultuan 40.9 % më shumë se 5-mujori i 2022, ndërsa në vlerë ishin 8.5 miliardë lekë më të larta.

Sipas raportit të publikuar së fundmi mbi treguesit fiskal të ardhurat nga tatimi mbi fitimi rezultuan edhe 32.7 % më shumë se plani i vitit 2023 për tatimin mbi fitimin. Në vlerë ishin 7.2 miliardë lekë më të larta se sa parashikimi.

Rritja e nivelit të të ardhurave të mbledhura nga ky zë, lidhet me një fitim më të lartë të bizneseve për shkak të rritjes së çmimeve, i diktuar nga kriza, por dhe me miradministrimin tatimor.

Nga analiza e tatimit mbi fitimin sipas sektorëve rezulton se sektori i shërbimit dhe sektori i ndërtimit, tregtia dhe prodhimi patën rritjen më të lartë, krahasuar me të njëjtën periudhë të vitit të mëparshëm.

Tatimit mbi fitimin i nënshtrohen personat juridikë dhe ortakëritë që janë regjistruar për TVSH-në, personat juridikë, si dhe ortakëritë e tjera të personave të themeluara ose të organizuara në bazë të një ligji të huaj dhe që ushtrojnë veprimtari në territorin e Republikës së Shqipërisë, çdo person tjetër, pavarësisht nga statusi ose forma ligjore e regjistrimit apo e njohjes së tij, kur ky është subjekt i tatimit mbi vlerën e shtuar, me përjashtim të rastit kur ky person është subjekt i tatimit të thjeshtuar mbi fitimin për biznesin e vogël.