NASA lëshon robotët në Mars

NASA lëshon robotët në Mars

Shkencëtarët mendojnë se Marsi dikur mund të ketë qenë i banueshëm ndaj mund të popullohet edhe nga njerëzit në të ardhmen. Këto hipoteza të tyre pritet t'i provojnë dy nga robotët e posaçëm që nisin udhëtimin drejt planetit të kuq.

Agjencia Amerikane e Aeronautikës dhe e Hapësirës po kthehet për herë të nëntë në planetin e Marsit me misionin, këtë radhë, për të gjetur shenja jete nga e shkuara.

Një mjet me rrota i gjeneratës së fundit, i pajisur me një minihelikopter eksplorues, pritet të zbresin në sipërfaqen e planetit të kuq pas shtatë muajve.

Projekti i ka kushtuar NASA-s rreth 2 miliardë e gjysmë dollarë dhe ka për synim identifikimin e zonave që dikur mund të kenë pasur kushtet e domosdoshme për rritjen e organizmave, të analizojë formacionet shkëmbore për fosile, të mbledhë mostra nga terreni dhe të testojë prodhimin e oksigjenit në atmosferën e Marsit përpara dërgimit të njerëzve në planet.

"Marsi dikur ka qenë i mbuluar me ujë, të paktën hemisfera veriore e tij ka qenë dy e treta oqean. Ka qenë i ngjashëm me Tokën por pyetja që kemi është a ka qenë realisht i banueshëm. Për këtë mision do zbresim në Kraterin e Xhezeros, një ish-liqen i formuar 3 miliardë vite më parë. Sot është tharë, sigurisht, por mendojmë se po të ketë pasur shenja jete në Mars, ai është vendi i parë ku duhet të shohim."

Administratori i NASA-s, Xhim Brajdënstajn, tregon se roboti 1-tonësh që do udhëtojë në Mars vitin e ardhshëm përmban teknologjitë më moderne si të fotografimit, edhe të komandimit.

Por risia është minihelikopteri 1,8-kilogramësh që gjendet në barkun e sondës, dhe që do skanojë terrenin nga sipër për ta ndihmuar robotin të shmangë pengesat gjatë lëvizjes në Mars.

Për shkak të baterisë, fluturimet do të zgjasin jo më shumë se 90 sekonda, ngritja nga toka do të kufizohet në 5 metra dhe distanca nga sonda jo më tepër se 300 metra.

"Kjo do jetë hera në historinë e njerëzimit që një helikopter yni fluturon në një botë tjetër. Komandat nga ne jepen 7 minuta më herët dhe roboti është programuar që të operojë i pavarur."

NASA pritet të testojë edhe teknologjinë e kthimit të dioksidit të karbonit në oksigjen të pastër për të provuar a mund të jetë Marsi një planet i banueshëm për njerëzit në të ardhmen.

Gjetjet dhe dhjetëra mostra të mbledhura në planetin e kuq pritet të mbërrijnë në Tokë vetëm në vitin 2031.

Më herët gjatë muajit, Kina dhe Emiratet e Bashkuara Arabe ishin dy ndër shtetet që dërguan robotët e tyre eksploruese drejt Marsit.

EMISIONET