Ambasadorja franceze në Shqipëri, thotë se debati për listat dhe koalicionet janë çështje e brendshme e politikës, por për të pasur rezultat do të duhet bashkëpunim mes mazhorancës e opozitës. Nga Pogradeci, zëri zyrtar i Parisit, foli edhe për integrimin ku theksoi se është gabim të thuhet se kushte për Shqipërinë po shtohen.

Teksa politika shqiptare është përfshirë në debatin e nxehtë për ndryshimet kushtetuese, për listat e hapura dhe koalicionet parazgjedhore, ndërkombëtarët duket se kanë vendosur të qëndrojnë jashtë.

Ambasadorja Franceze, Christine Vasac nga Pogradeci tha se kjo është çështje tërësisht shqiptare.

Por këshilloi bashkëpunim mes palëve.

‘‘Ka një projekt te rieditimit të të gjithë Kushtetutes shqiptare. Kryeministri është shprehur në mënyrë publike dhe në Parlament në lidhje me këtë. Ka edhe një qëndrim të presidentit të vendit ,i cili na mblodhi ne të gjithë ambasadoreve të BE dhe të Mbreterisë së Bashkuar dje. Ju përket shqiptarëve dhe vetem atyre që ta trajtojnë këtë çështje. Ka një kalendar i cili është vendosur dhe nëse do të respektohet ose jo kalendari këtë do ta tregoje koha. Por do të duhet një bashkëpunim i pozitës dhe opozitës në menyrë qe ne të marrim një rezultat.”

Christine Vasac tha se ambasadorët nuk mund t’i tregojnë shqiptarëve modelin si duhet të zgjedhin përfaqësuesit.

”Mos prisni një përgjigje prej meje mbi themelin e organizimit, sepse kjo është një çështje shqiptare.”

Integrimi i Shqipërisë, përkundrazi është proces ku ambasadorët janë investuar ndër vite.

E pyetur për qëndrimin e BE nëse nuk ka një reformë të plotë në sistemin e drejtësisë dhe sistemin zgjedhor, Vasak theksoi se është gabim të thuhet pa pushim se po shtohen kushtet.

”Është gabim të themi papushim që po shtohen kushtet për Shqipërinë. Unë ju sugjeroj që të lexoni konkluzionet e 25 marsit dhe konkluzionet e mëparshme. Interesi i Shqiperisë është që të mbahet sa më parë konferenca ndërqeveritare dhe për këtë duke punuar ambasadori Zef Mazi i emëruar nga kryeministri.”

Ambasadorja Franceze ishte në Pogradec ku dhuroi maska për Bashkinë!