Video: Mbesa adoleshente e bosit të drogës El Çapo këndon në rrugën e Londrës

Mbesa adoleshente e bosit famëkeq meksikan të drogës Hoakin "El Çapo" Guzman është duke vizituar disa nga destinacionet më magjepsëse të Europës ndërsa përpiqet të bëjë karrierë si një influencere dhe këngëtare pop.

Frida Guzman, 18 vjeçe, është vajza e Edgar Guzmanit, i cili u qëllua nga vrasës me pagesë nga një kartel rival në vitin 2008. Babai i tij, "El Çapo", 66 vjeç, themeluesi dhe ish-bosi i kartelit të pamëshirshëm Sinaloa, po vuan dënimin e përjetshëm me burg plus 30 vjet në burgun Florence Supermax në Kolorado.

Ditët e fundit, Frida ka postuar "selfie" për 110,000 ndjekësit e saj në Instagram ku ajo shfaqet në vende të ndryshme, duke përfshirë jashtë Pallatit Buckingham, në një shëtitje me varkë në Loch Ness, një degustim uiski Johnnie Walker në Edinburg dhe, në Francë, Pallati i Versajës, muzeu i Luvrit dhe Kulla Eifel.

Në një momente, ajo madje shfaqet duke lëvizur në qendër të Londrës, siç thuhet në sheshin Leicester, ku ajo prezantohet nga një burrë i paidentifikuar thjesht si "Frida", para se të këndojë një baladë me një melodi të regjistruar kitare. Videoja e shkurtër është titulluar në spanjisht: "Ëndrra ime për të kënduar në rrugët e Londrës. Misioni u realizua."

Frida ka vite që ndjek një karrierë pop. Në vitin 2021, ajo doli e treta në Tengo Talento, Mucho Talento, një shfaqje televizive reality e ngjashme me Britain's Got Talent, në Estrella TV, një rrjet në gjuhën spanjolle që ka në qendër të vëmendjes popullsinë e madhe hispanike të SHBA.

Pas vrasjes me pagesë të babait të saj Edgar në parkingun e makinave të një qendre tregtare, nëna e saj, mbretëresha e bukurisë Griselda Guadalupe Lopez u transferua në Los Anxheles dhe më pas u martua me boksierin Julio Cesár Chávez Junior, djalin e boksierit të madh Julio Cesár Chávez.

Imazhi i kuruar me kujdes në internet i Fridës është një kontrast i fortë me karrierat e përgjakshme të gjyshit, babait dhe xhaxhallarëve të saj, nga të cilat ajo është distancuar – edhe pse ajo nuk e mohon trashëgiminë e saj familjare. Duke pasur parasysh prejardhjen e tyre kriminale, ajo mund të jetë gjithashtu një nga anëtarët e paktë të familjes së saj të lejuar në Mbretërinë e Bashkuar.

"El Çapo" – që do të thotë "i shkurtër" në spanjishten meksikane – themeloi dhe udhëhoqi kartelin Sinaloa, dikur furnizuesi kryesor i kokainës në SHBA dhe besohet të ketë urdhëruar qindra dhe ndoshta mijëra vrasje.

Forcat meksikane të sigurisë e arrestuan tri herë, por ai u arratis dy herë, duke kontribuuar në statusin e tij pothuajse mitik si lideri i kartelit më të fuqishëm në botë, i rivalizuar vetëm nga bosi i ndjerë kolumbian i drogës Pablo Eskobar.

Por ai u ekstradua përfundimisht në SHBA dhe u gjykua në Nju Jork në vitin 2019. Juria, e cila u lejua të qëndronte anonim për sigurinë e tyre, e shpalli fajtor për trafik droge, vrasje dhe një sërë krimesh të tjera të rënda. Para kapjes së tij, pasuria e tij neto vlerësohej në 1 miliard dollarë.