Shikim i turbullt në mëngjes? Ja rastet kur duhet të konsultohesh me mjekun

Shikimi i turbullt në një ose të dy sytë në mëngjes është diçka që u ndodh shumë njerëzve. Në shumicën e rasteve nuk është shqetësuese dhe shikimi pastrohet pas disa pulsimesh ose fërkimit të syve.

Pse mund të kesh shikim të turbullt në mëngjes

Sy të thatë (mungesë lotësh)

Lotët e mbajnë syrin të lagësht dhe të mbrojtur. Gjatë natës, lotët mund të thahen në sipërfaqen e syrit dhe në mëngjes krijojnë mjegullim ose turbullim të shikimit. Zakonisht kalon shpejt pas disa pulsimeve.

Alergjitë mund të shkaktojnë kruarje, skuqje, lotim dhe tharje të syve, që sjellin shikim të turbullt në mëngjes. Shpesh lidhen me pluhurin, merimangat ose qimet e kafshëve në dhomë, ose detergjentët e çarçafëve.

Fjetja me fytyrë poshtë

Gjumi me fytyrën përmbys mund të shkaktojë një gjendje ku qepalla e sipërme humb elasticitetin, duke sjellë turbullim të shikimit në mëngjes, lotim dhe djegie të syve. Më shpesh shfaqet te personat mbipeshë, por mund t’i ndodhë kujtdo.

Distrofia e kornesë së Fuchs

Është një gjendje e trashëguar që shkakton ënjtje të kornesë gjatë gjumit, duke bërë që shikimi në mëngjes të jetë i mjegullt. Zakonisht përmirësohet gjatë ditës. Më e zakonshme te gratë mbi moshën 50 vjeç.

Marrja e disa ilaçeve para gjumit

Antihistaminikët, ilaçet për gjumë, ilaçet për ftohje dhe disa ilaçe për tensionin mund të ulin prodhimin e lotëve, duke shkaktuar sy të thatë dhe shikim të turbullt në mëngjes.

Fjetja me lente ul furnizimin me oksigjen të syve dhe mund të shkaktojë tharje dhe turbullim të shikimit. Lentet duhet të hiqen gjithmonë para gjumit.

Konsumimi i alkoolit para gjumit

Alkooli shkakton dehidratim, që mund të çojë në tharje të syve dhe shikim të paqartë në mëngjes.

Probleme me sheqerin në gjak

Sheqeri shumë i lartë ose shumë i ulët mund të shkaktojë turbullim të shikimit në mëngjes. Shpesh shoqërohet me simptoma të tjera si lodhje, marramendje dhe dobësi. Në disa raste mund të jetë shenjë e diabetit.

Probleme me gjëndrat e yndyrës së syrit

Gjëndrat e vogla rreth syrit mund të prodhojnë yndyrë të tepërt gjatë natës, duke shkaktuar irritim dhe shikim të turbullt në mëngjes.

Gjumi me ventilator të drejtuar nga fytyra

Ajri i vazhdueshëm mund të thajë sytë dhe lëkurën edhe gjatë gjumit, duke sjellë kruarje, irritim dhe turbullim të shikimit.

Kur duhet të shkosh te mjeku

Nuk është e nevojshme të shqetësohesh nëse turbullimi zhduket shpejt pas zgjimit ose ndodh herë pas here.

Duhet të kontrollohesh te mjeku nëse:

turbullimi vazhdon gjatë gjithë ditës

ndodh shpesh pa arsye të qartë

shoqërohet me simptoma të tjera

Në raste të rralla, shikimi i turbullt mund të lidhet me probleme serioze si goditja në tru, ndaj nëse shfaqen simptoma si vështirësi në të folur, dobësi në njërën anë të trupit, marramendje ose dhimbje koke e fortë, duhet kërkuar urgjencë mjekësore.