Ronaldinjo dhe Dita prezantojnë koleksionin ekskluziv të syzeve para Kupës së Botës!

Legjenda braziliane e futbollit, Ronaldinho, ka bashkuar forcat me Dita Eyewear për të prezantuar një koleksion të ri dhe ekskluziv syzesh, i cili do të dalë në treg pak para fillimit të Kupës së Botës 2026.

Koleksioni “Ronaldinjo x Dita” kombinon stilin karakteristik të ish-futbollistit me dizajnin luksoz dhe performancën teknike që kanë bërë të njohur markën amerikane të syzeve. Sipas kompanisë, koleksioni është frymëzuar nga krijimtaria, vetëbesimi dhe energjia që Ronaldinjo ka shfaqur gjatë karrierës së tij sportive.

“Futbolli ka qenë gjithmonë i lidhur me krijimtarinë, vetëbesimin dhe gëzimin. Ky koleksion përfaqëson stilin tim dhe pasionin tim për përsosmërinë”, deklaroi Ronaldinjo.

Linja përfshin tre modele të edicionit të kufizuar, të punuara me dorë në Japoni. Dy prej tyre bazohen në serinë teknike Dita Lancier dhe ofrojnë lente me trajtim kundër reflektimit dhe mbrojtje të avancuar për përdoruesit. Modeli i tretë, Dubsignal, sjell një dizajn navigator me përmasa të mëdha dhe detaje dekorative të frymëzuara nga kultura braziliane.

Sipas zëvendëspresidentit të Dita-s, Cody Cho, Ronaldinjo mbetet një simbol global i individualitetit dhe artit në sport, ndërsa koleksioni synon të pasqyrojë lëvizjen, kreativitetin dhe elegancën që ai solli në futboll.

Të gjitha modelet ofrojnë mbrojtje 100 për qind ndaj rrezeve UVA dhe UVB. Koleksioni është tashmë i disponueshëm online dhe në dyqane të përzgjedhura, me çmime që variojnë nga 345 deri në 895 dollarë.