“Mozaik 2021”/ Piktori Myftar Cubi hap ekspozitën në Shkodër
Piktori, Myftar Cubi, çeli në Shkodër të parën ekspozitë personale pagëzuar Mozaik 2021.
Pedagogu i Akademisë së Arteve paraqet aty punime të realizuara ndër vite mes të cilave gjen një ndërthurje të veçantë nga figurat biblike, tek portretet e personazheve historike dhe erosi.
Elemente që i kanë dhënë mundësinë të shpreh ndjesitë e brendshme përmes një stili unik, duke kombinuar gurë më gurë.
E jo më kot gjithçka ai e nis me historinë e qytetit të tij, "Rozafën".
“Se kur themi Rozafë kuptojmë Shkodër, dhe kur themi Shkodër, kuptojmë Rozafë. “- tha ai.
Cubi është shquar për artet vizive dhe i ka kushtuar një jetë mozaikut, ku punimet e tij janë pjesë e ekspozitave thuajse në të gjitha kontinentet.
“Dashuria për artin si duket ka lindur bashkë me mua dhe mozaikun unë kam brenda shpirtit.”- shprehet më tej ai.
I vlerësuar me titullin "Nderi i qarkut Shkodër" dhe qytetar Nderi i Malësisë së Madhe, prej nga ku ka prejardhjen, Myftar Cubi njihet si piktori i mozaikut në Shqipëri për të cilin hyri edhe në librin Guinnes.
Në Shtëpinë e Bardhë gjendet një pikturë e tij, dedikuar tragjedisë së kullave binjake më 11 shtator 2001.
Kjo pikturë që ka fituar mbi 5 çmime kombëtare dhe ndërkombëtare, drejtoi vëmendjen tek artisti shqiptar Myftar Cubi, i cili është vlerësuar mes 500 artistëve të njohur të botës që punojnë me teknika speciale.