Greva e urisë, gratë naftëtare refuzojnë kujdesin shëndetësor
Gratë naftëtare refuzuan kujdesin mjekësor në ditën e tretë të Grevës së Urisë për pagat e prapambetura dhe rinisjen e punës, ndërsa theksojnë se do të qëndrojnë aty deri në plotësimin e kërkesave.
Ndërkohë Kreu i Sindikatës së Naftëtarëve, tha se çështjen e tyre e kanë marrë në dorë një grup avokatësh që mbrojnë të drejtat e punëtorëve në botë.
Ballsh- Në ditën e tretë në ngrujim, gratë naftëtare në grevë urie refuzuan kujdesin shëndetësor.
Por pavarësisht gjendjes që po rëndohet, thonë se do të qëndrojnë aty deri në momentin e fundit.
"Ta kene të qartë nuk dalim këtu, vetëm të vdekura"
Kërkesat mbeten të njenjta, pagat e prapambetura dhe rinisja e punës në rafineri! Ndërsa thirrjet për ndërhyrje shkojnë si cdo ditë për kreun e qeverisë.
"Duam bukën e gojës, djersën e gjakun tonë. 26 rrogat e prapambetura"
Këtë të shtunë, 17tetor 2020, u bënë 20 ditë që kur naftëtarët nisën grevën e urisë dhe protestat.
Kreu i Sindikatës së Naftëtarëve Sokol Dautaj tha se cështja e tyre tashmë është ndërkombëtarizuar.
Një grup avokatësh ndërkombëtar që mbrojnë të drejtat e punëtorëve në botë i kanë kontaktuar dhe u janë drejtuar me letër krerëve të shtetit shqiptar.
Rafineria e Ballshit ka pezulluar punën që prej vjeshtës së kaluar, ndërsa naftëtarët kanë rroga të prapambetura të viteve më parë, për të cilat kanë fituar edhe drejtën në Gjykatë.