Braçe kërkon mbrojtjen e Butrintit nga investimet strategjike, socialistët e rrëzojnë

Braçe kërkon mbrojtjen e Butrintit nga investimet strategjike,

Komisioni i Ekonomisë miratoi të martën projektligjin që synon t’i kalojë menaxhimin e Butrintit një fondacioni ndërsa socialistët hodhën poshtë propozimin e kolegut të tyre Erjon Braçe për të shtuar një nen në mbrojtje të Parkut Kombëtar të Butrintit nga kërkesat e “investitorëve strategjikë” për parcela ndërtimore.

Marrëveshja për menaxhimin e Butrintit u miratua nen për nen në Komisionin parlamentar të Ekonomisë të martën, pavarësisht kundërshtimit të opozitës ndërsa deputeti socialist Erjon Braçe tentoi të fuste në projektligj një klauzolë detyruese për qeverinë që të garantonte kufinjtë aktualë të Parkut Kombëtar të Butrintit nga ndërtime të reja që vijnë si projekte strategjike.

Ai i propozoi komisionit që të shtohej një fraksion në nenin 1 të marrëveshjes me formulimin; “Ngarkohet Këshilli i Ministrave të mbrojë dhe garantojë paprekshmërinë e kufinjve të Parkut Kombëtar të Butrintit, zonë e mbrojtur Ramsar”. Braçe tha se kjo garanci bëhet për të mbrojtur marrëveshjen në fjalë dhe peisazhin e zonës, “nga gjithë interesi i shtuar për të ndërtuar aty për qëllime të tjera që janë të ndryshme nga natyra apo arkeologjia”.

Ministrja e Kulturës Elva Margariti e kundërshtoi këtë propozim formalisht, pasi sipas saj, ishte jashtë objektit të marrëveshjes që po diskutohej.

“Nuk është pjesë e marrëveshjes së administrimit”- tha ajo, e cila prek vetëm zonën A3 në Butrint dhe jo nënzonat e tjera të mbrojtura.

Por, sipas Braçes, pa mbrojtjen e këtij territori, “parku arkeologjik do të jetë nën agresion vazhdimisht”. “Ai qytet antik do kthehet si amfiteatri i Durrësit pa këtë peizazh të mbrojtur”- i tha ai ministres duke shtuar se shqetësimi lidhej pikërisht me investimet strategjike që po kërcënojnë zonat e mbrojtura.

“Në dijeninë time të paktën në një rast zona e mbrojtur e këtij parku është cënuar”- tha ai, duke shtuar se, e kishte të vështirë të pranonte që ndërtimi i vilave ishte interes strategjik për Shqipërinë.

Në një investigim të BIRN rezultoi se Komiteti i Investimeve Strategjike kishte miratuar një projekt brenda kufinjve të parkut të Butrintit dhe më pas kishte hequr ngastrat që prekeshin nga harta e zonave të mbrojtura, dhe në një rast tjetër kishte miratuar “projekt me potencial strategjik” brenda zonës Ramsar.

Sipas ministres së Kulturës, detyrimet e qeverisë për mbrotjjen e zonave të mbrojtura janë garantuar në planin e menaxhimit të integruar.

Drejtuesja e mbledhjes Blerina Gjylameti e cilësoi propozimin e kolegut të saj jashtë objektit të projetkligjit dhe nuk e hodhi në votim duke propozuar që të merret parasysh nga qeveria për ta “jetësuar në një dokument tjetër”.

Projektligji “Për miratimin e marrëveshjes për administrimin e nënzonave të trashëgimisë kulturore dhe peizazhit kulturor, pjesë e Parkut Kombëtar të Butrintit, ndërmjet Ministrisë së Kulturës dhe Fondacionit për Menaxhimin e Butrintit” u kritikua nga deputetët e opozitës. Sipas tyre marrëveshja parashikonte një dhënie me konçension të pasurive kombëtare, pasi bordi i fondacionit ka shumicën e anëtarëve nga Fondi Shqiptaro-Amerikan i Zhvillimit.

Deputetja Ina Zhupa, e cila ka bërë oponencën e këtij projektligji ripërsëriti dhe një herë qëndrimin e saj në komision, sipas të cilit, marrëveshja binte në kundërshtim me Konventën e Parisit për trashëgiminë kulturore dhe se i jep privatit një rol vendimtar në menaxhim, duke anashkaluar rolin e shtetit. Ministrja Margariti e mbrojti marrëveshjen si një model të suksesshëm menaxhimi të trashëgimisë kulturore.

Gjatë votimit deputeti i PD-së, Bujar Leskaj, i cili e kishte kundërshtuar këtë marrëveshje më herët, abstenoi dhe sqaroi votën e tij si një “konflik interesi”. “Unë posedoj një prej ndërtesave të vjetra të sheshit të flamurit në Vlorë që është rikonstruktuar nga një projekt i AADF-së”- tha ai. /Reporter.al/

EMISIONET