Në 24 orët e fundit nuk u shënua asnjë viktimë nga Covid-19 në vend.

Për mjekun pneumolog Arjan Mezini ky është një lajm i mirë dhe se është ulur numri i thirrjeve në urgjencë.

Arjan Mezini: ”Është një sëmundje me një gravitet shumë të rëndë, 4 herë më vdekjeprurës se gripi stinor. Ajo që ne vërejmë në spitale, është se ka një rënie të numrit të urgjencave. Por, a ka të bëjë një rënie të agresivitetit të virusit, apo njerëzit qëndrojnë në shtëpi, vazhdojnë trajtimin sepse kanë frikë nga spitali, këtë nuk e them dot.”

I ftuar në ”Ora News”, Mezini tha se personat që infektohen duhet të ruajnë qetësinë dhe të kujdesen për shëndetin e tyre.

Arjan Mezini: ”Duhet të ruajmë qetësinë. Sidomos te pacientët që ne konsultohemi, ka tendencë për një mjekim të ekzagjeruar, janë disi mosbesues. Ajo që do thoja është që njerëzit të monitorojnë shëndetin e tyre, dhe të ruajnë qetësinë. Kjo sëmundje është e rëndë sidomos për disa persona me imunitet të dobët dhe sëmundje bashkëshoqëruese.”

Ai u bëri thirrje njerëzve që të mos kenë frikë për të shkuar në spital, pasi mjekët bëjnë përpjekje të mëdha për të shpëtuar jetë.

Arjan Mezini: ”Njerëzit nuk duhet të kenë frikë nga ardhja në spital atëherë kur është e nevojshme, sepse në çdo spital përpjekjet e mjekëve janë maksimale për të shpëtuar jetë. Qendrimi në shtëpi për një kohë të gjatë kur gjendja vjen duke u agravuar, bën që pacienti të vijë në gjendje të rëndë, ku dhe spitali ka shumë pak mundësi për të dhënë ndihmë. Është një sëmundje që shkakton një pneumoni shumë të rëndë. Do bëja thirrje që njerëzit të mos kenë frikë që të shkojnë në spitale.”

Intervistoi në studio Sebastian Zonja, përgatiti për online Renato Çaushi.