Të shtëna brenda shkollës në Dallas/ 17-vjeçari i lënduar, nxënësit ikin me panik

Një ngjarje e rëndë ka tronditur sot qytetin e Dallasit në Teksas, ku një incident me armë zjarri brenda ambienteve të një shkolle të mesme ka lënë të plagosur një 17-vjeçar.

Sipas autoriteteve amerikane, ngjarja ka ndodhur në shkollën Wilmer-Hutchins High School, pak para orës 13:10 me orën lokale. Raportet fillestare të CBS News dhe FOX News tregojnë se një student dyshohet të ketë hapur zjarr ndaj një nxënësi tjetër, duke shkaktuar kaos dhe panik masiv në mesin e të rinjve që ndodheshin në ndërtesë.

I plagosuri, një 17-vjeçar, është qëlluar në këmbë dhe është transportuar menjëherë drejt spitalit. Gjendja e tij raportohet si e qëndrueshme, ndërsa policia ka nisur hetimet për të zbuluar motivet e ngjarjes.

Ende nuk ka informacione zyrtare nëse autori është arrestuar apo është në kërkim. Pamje nga vendngjarja tregojnë forca të shumta policie dhe ambulanca që rrethojnë shkollën, ndërsa dhjetëra studentë janë parë teksa largohen me vrap dhe frikë nga godina.

Kjo ngjarje vjen në një kohë kur dhuna me armë në ambientet shkollore në SHBA është bërë një shqetësim i përsëritur, duke ngritur sërish pyetje për sigurinë nëpër shkolla, masat parandaluese dhe politikat e kontrollit të armëve.

Autoritetet lokale kanë bërë thirrje për qetësi dhe kanë siguruar prindërit se situata është nën kontroll, ndërkohë që pritet një konferencë për shtyp për të dhënë më shumë detaje rreth incidentit.