Gjermania paralajmëron konfrontime Rusi-NATO

Ministrja e Brendshme gjermane, Nancy Faeser ka paralajmëruar për konfrontim në rritje midis Rusisë dhe NATO-s, në një intervistë për gazetën ”Handelsblatt”, të botuar sot.

”Presidenti rus Vladimir Putin nuk ka më skrupuj”, sipas Faeser dhe ”është bërë më agresiv ndaj anëtarëve të NATO-s, si Gjermania, që nga fillimi i pushtimit në shkallë të plotë të Ukrainës në shkurt 2022”.

“Që nga lufta ruse e agresionit kundër Ukrainës, ne kemi përjetuar një pikë kthese në sigurinë e brendshme. Rusia po zhvillon një luftë hibride në Evropë. Është e qartë se fushatat e dezinformimit, aktet e sabotimit dhe sulmet kibernetike janë të kontrolluara nga shteti”, tha ajo.

Por, Faeser kërkoi ”përmbajtje dhe maturi në përgjigje” duke thënë se “duhet të vazhdojmë të veprojmë me vendosmëri, por në të njëjtën kohë me maturi”.

”Kancelari Olaf Scholz ka vepruar gjithmonë për të parandaluar Gjermaninë të binte në një skenar të tillë, por sigurisht ne mund të shohim se situata e kërcënimit hibrid po rritet. Kjo është arsyeja pse ne duhet të pozicionohemi dhe të mbrohemi krejtësisht ndryshe”, tha ajo.

Para zgjedhjeve të Parlamentit Evropian në qershor, shërbimet gjermane të sigurisë dhe partnerët e tjerë të BE-së zbuluan një fushatë masive ndikimi dhe gënjeshtrash ruse.

”Autoritetet gjermane do të ndërmarrin hapat e nevojshëm për të kundërshtuar çdo përpjekje të tillë për të ndikuar në zgjedhjet e ardhshme të parakohshme të Gjermanisë të planifikuara për në shkurt dhe agjencia vendase e shërbimit sekret së vendit ka ngritur një grup pune”, tha ajo.

Kur u pyet nëse Rusia kishte intensifikuar aktivitetet e saj sabotuese, Faeser tha se “ne po regjistrojmë një rritje të konsiderueshme. Kjo është arsyeja pse infrastruktura kritike duhet të mbrohet më mirë”.

Ajo tha se qeveria aktuale e koalicionit ka paraqitur një ligj që synon përmirësimin e sigurisë fizike të objekteve të rëndësishme, si qendrat e energjisë, transportit dhe telekomunikacionit.

Ajo i kërkoi opozitës konservatore CDU/CSU të mbështesë ligjin, duke thënë se bllokimi i tij do të ishte i papërgjegjshëm duke pasur parasysh kërcënimet aktuale të shtuara.

Qeverisë në largim i mungon shumica në parlament dhe duhet të mbështetet në mbështetjen e opozitës për të shndërruar çdo masë në ligj.