Emiratet e Bashkuara Arabe angazhohen për 1.4 trilion dollarë investime në SHBA. Zbulohen marrëveshjet e bashkëpunimit

Emiratet e Bashkuara Arabe janë zotuar për një kornizë investimi në një hark kohor 10-vjeçar, prej 1.4 trilion dollarë në Shtetet e Bashkuara, pasi zyrtarët e lartë të Emirateve të Bashkuara Arabe takuan Presidentin Donald Trump këtë javë, tha Shtëpia e Bardhë të premten.

Korniza do të “rrisë ndjeshëm investimet ekzistuese të Emirateve të Bashkuara Arabe në ekonominë amerikane” në infrastrukturën e AI, gjysmëpërçuesit, energjinë dhe prodhimtarinë, tha Shtëpia e Bardhë në një deklaratë.

Shtëpia e Bardhë nuk ka shpjeguar se si investimet e Emirateve Arabe do të arrijnë në 1.4 trilionë dollarë, duke përfshirë disa nga marrëveshjet që janë zbuluar si pjesë e kuadrit dhe që janë njoftuar tashmë.

Marrëveshja e vetme plotësisht e re duket të jetë një investim nga Emirates Global Aluminium, tha Shtëpia e Bardhë, duke shtuar se kjo paketë investimi “do të dyfishonte pothuajse prodhimin e aluminit në Shtetet e Bashkuara”.

“Krijimi i një forni primar për aluminin në SHBA ka qenë një nga ambiciet e EGA-së për disa vjet,” tha një zëdhënës i kompanisë në një deklaratë.

Emiratet e Bashkuara Arabe, një prodhues nafte dhe partner i gjatë i sigurisë së SHBA-së, po synon të thellojë lidhjet e investimeve me Uashingtonin dhe po shfaqet si një lider global në AI, një nga sektorët për të cilat po bën bast për të diversifikuar ekonominë e saj larg energjisë.

Në shtator, Presidenti i EBA-së, Sheikh Mohamed bin Zayed Al Nahyan, u takua me ish-Presidentin e SHBA-së Joe Biden, në vizitën e parë të një presidenti të EBA-së në Shtëpinë e Bardhë, ku të dy liderët diskutuan thellimin e bashkëpunimit në fusha si AI, investime dhe eksplorimin e hapësirës.

Fondet e pasurisë sovrane të Gjirit, përfshirë Mubadalanë e Abu Dabit me 330 miliardë dollarë, janë tashmë investitorë të mëdhenj në SHBA, dhe Trump dhe familja e tij kanë lidhje biznesi me rajonin.