Ballkani bëhet gati të ndeshet me pasojat e stuhisë Leandros, që duke filluar nga e enjtja do të ndikojë thuajse gjithë Greqinë kontinentale. Stuhia do të sjellë temperatura nën zero dhe dëborë në rajonet e ulëta. Sinoptikanët kanë paralajmëruar se efektet e stuhisë do të zgjasin deri të hënën dhe problemet në qarkullim do të jenë më të dukshme gjatë natës.

Fronti i ftohtë atmosferik largohet nga Spanja dhe zhvendoset në drejtim të Europës Lindore duke përshkuar së pari Greqinë dhe rajonin e Ballkanit.

Sipas Observatorit Kombëtar të Athinës, fronti i ftohtë do të ulë ndjeshëm temperaturat dhe do të ndikojë Greqinë nga e mërkura në mbrëmje deri në të hënën tjetër më 18 janar.

Temperaturat do të ulen nën zero gradë Celsius gjatë natës, përfshirë edhe në zonat e ulëta, ndërsa zonat malore në Greqinë Veriore dhe Qendrore do të ndikohen nga acari të shtunën dhe të hënën.

Stuhia “Leandros” do të sjellë reshje dëbore edhe në zonat e ulëta të Maqedoninë, Trakisë dhe Thesalisë. Dëborë dhe acar do të ketë edhe në mbarë rajonet malore dhe gjysmëmalore të Greqisë kontinentale duke filluar nga e enjtja në mbrëmje.

Edhe pse moti i keq do të jetë me intervale, dëbora dhe i ftohti ekstrem do të sjellin probleme të shumta, sidomos gjatë natës.

Ndryshe nga pjesa kontinentale, në ishullin e Kretës temperaturat arritën deri në 28 gradë Celsius, çka solli mbushjen e plazheve.  

Pre një jave moti i keq ka mbërthyer Spanjën, ku paralizoi për disa ditë edhe kryeqytetin, Madridin.

Autoritetet aty u detyruan të dislokojnë në rrugë edhe ushtrinë për të zhbllokuar aeroportin ndërkombëtar të Madridit dhe për të garantuar transportimin dhe shpërndarjen e vaksinës kundër Covid-19.

Në Ballkan moti i keq ka shkaktuar probleme me përmbytjet, veçanërisht në Shqipëri dhe në Kosovë.