Progres raporti për Shqipërinë dhe Maqedoninë do të shtyhet për shkak të frikës se çështja e zgjerimit mund të keqpërdoret nga partitë populiste në zgjedhjet evropiane. Shtyrjen e datës e konfirmoi dhe komisioneri për zgjerimin, Jonahes Han, i cili theksoi se debati duhet të bëhet mbi fakte.  

Bashkimi Evropian druhet se zgjedhjet për Parlamentin Evropian dhe fushata e partive populiste evropiane mund të ndikojnë procesin e zgjerimit. Një frikë e tillë ka shtyrë datën e publikimit të progres raportit për vendet e Ballkanit Perëndimor, jo sipas parashikimit por pas zgjedhjeve.

Shqipëria dhe Maqedonia e Veriut presin që sivjet të marrin miratimin nga vendet anëtare për hapjen e negociatave të anëtarësimit me BE-në dhe takimi i krerëve të bllokut në të cilin do të vendoset për fatin e negociatave është caktuar më 20 dhe 21 qershor. Deri tani mbetet e pasigurt nëse raporti të publikohet para kësaj date, apo vendimi do të shtyhet për në vjeshtë.

Shtyrjen e datës së publikimit të progres raportit e konfirmoi dhe komisioneri për zgjerimin, Jonahes Han, i cili theksoi se debati duhet të bëhet mbi fakte. 

“Në këtë drejtim synojmë të shmangim të gjitha pengesat e mundshme që do ta vështirësojë debatin objektiv, neutral, i cili nuk duhet të preket nga zgjedhjet në Bashkimin Europian. Mendojmë që publikimi të ndodhë më vonë nga e zakonshmja në mënyrë që debati për zgjerimin të bazohet në fakte. Në çdo rast do të publikohen para inaugurimit të Parlamentit të ri Europian”, tha Han.

Me herët pati spekulime se publikimi i raporteve të progresit për Shqipërinë dhe Maqedoninë e Veriut mund të shtyhej deri në javën e parë të qershorit.

/Ora News.tv/