Kadastra e Durrësit është nën presion për regjistrim të paligjshëm të pallateve. Zv/ kryeministri Erjon Braçe zbulon të vërtetën që fshihet pas arrestimit të Liridon Pulës me detyrë drejtor i Kadastrës në Durrës.

Sipas Braçes bëhet fjalë për një historie të gjatë gati një mujore presioni, shantazhi kriminal mbi Pulën. Zv/kryeministri ishte i pranishëm në seancën e sotme të vlerësimit të masës së sigurisë ndaj Liridon Pulës në Gjykatën e Durrësit.

Ndaj tij u dha masa e sigurisë 'arest me burg"

Prokurori dhe gjyqtarja presion psikologjik
Braçe  tha se prokurori i çështjes Arjan Ndjoi dhe gjyqtarja po i bëjnë presion psikologjik një zyrtari të shtetit dhe kujtoi se  prokurorë dhe gjyqtarë të tillë që nuk kanë kaluar vetingun nuk duhet të ekzistojnë në institucionet shqiptare.

Erjon Braçe: Pa më të voglin diskutim ky është akti final i një historie të gjatë gati një mujore presioni, shantazhi kriminal mbi atë punonjësin e shtetit që sot ishte me pranga në sallën e gjyqit. Presion kriminal që nuk është bërë për cështjen në fjalë për të cilën është akuzuar, por është bërë për pallate monstruoze, të cilat duhet të legalizohen dhe të regjistrohen në këtë qytet. Është bërë jo për atë që pretendon prokurori, po presion kriminal për ca vjedhje të tjera shumë të mëdha në kohë të ndryshme, në zonën e Gjirit të Lalzit dhe duke ardhur në Durrës. Kjo do të thotë që ai punonjësi i shtetit, pavarësisht shantazhit ka refuzuar të bëhet pjesë e këtyre veprimeve kriminale. Unë dyshoj shumë pas asaj që dëgjova për rreth 1 orë e gjysmë që e gjithë akuza e ngritur mbi të jo vetëm është e paprovuar, por ka dhe lajthitje marramendese që i referohen rregulloreve që sot nuk janë në fuqi.

Në rastin në fjalë duhet të ishte e provuar që drejtuesi i Kadastrës në Durrës duhet të kishte sjellë dëme të qarta mbi shtetin, gjë që nuk e pretendon as prokurori dhe në krahun tjetër duhet të kishte sjellë dëme mbi privatët. Kompaninë që ka bërë ndërtimet në Lalëz, ose partnerët e saj që janë pronarët e truallit atje. As nga pronarët e truallit, as nga kompania, as nga shteti nuk ka asnjë pretendim mbi veprimet që ka kryer regjistruesi apo punonjës të tjerë brenda zyrës së regjistrimit të Kadastrës në Durrës.

Ka forca të tjera që janë kundër këtij vullneti, janë kundë rinteresit të qytetarëve dhe janë kundër çdo nëpunësi shteti që kryen detyrën me nder, dinjitet dhe në përputhje me ligjin.

Reforma në drejtësi duhet të marrë gjithë këtë pisllëk zhuli. Ky është vetëm një rast, por imagjinoni sa raste të tjera ka që qytetarët merren nga zhuli dhe krimi që është instaluar në sistemin e drejtësisë. Janë ca njerëz që nuk kanë kaluar në vetting, të cilët duhet të kapërcejnë çdo radhe për të kaluar në vetting për ti dhënë fund krimit përkundrejt interesit publik dhe interesit qytetar në këtë vend."

Edhe kryeministri Rama nga kuvendi foli për një prokuror në Durrës që punon për organizatat kriminale. 

"Dhe të shikosh që ka të tjerë si një prokuror në Durrës, i cili është sot prokuror dhe punon për organizatat kriminale dhe ju bën shantazh nënpunësve të shtetit. Arrestojeni thonë. Mësojeni që nuk arreston kryeministri, as qeveria, arreston drejtësia", u shpreh Rama dje (3 tetor) në Kuvend.

/Ora News.tv/