Nënshtetësinë shqiptare për Janullatos ia kërkoi Kotzias-Bushatit në Kretë

Presidenti i Greqisë, Prokopis Pavlopulos, i ka shprehur homologut të tij shqiptar, Ilir Meta, falënderimet e tij për dhënien e nënshtetësisë shqiptare kryepeshkopit Anastas.

Sipas agjencisë greke të lajmeve, ANA-MPA, Pavlopulos ka pasur një bisedë telefonike me presidentin Meta, të martën.

Zoti Pavlopulos vuri në dukje se “kjo iniciativë e Presidentit shqiptar përbën veç të tjerash, një hap të rëndësishëm në drejtim të përmirësimit të mëtejshëm esencial të marrëdhënieve të Greqisë me Shqipërinë”.

Po sipas agjencisë ANA-MPA, Ministri i Jashtëm grek  e kishte shtruar çështjen e nënshtetësisë së kryepeshkopit edhe gjatë takimit të Kretës muajin e kaluar, me homologun e tij shqiptar, Ditmir Bushati.

Përndryshe, Kotzias ishte i pari që përshëndeti të dielën dhënien e nënshtetësisë kryepeshkopit, duke e komentuar si një “masë e njohjes së veprës thellësisht humanitare (të kryepeshkopi) dhe të forcimit të besimit ndërmjet dy popujve tanë”.

Lexo më shumë: Janullatos bëhet shqiptar për Krishtlindje, Meta i jep nënshtetësinë kryepeshkopit