Greqia në panik, lëkundet nga dy tërmete 5.1 dhe 4.3 ballë

Dy tërmete më intensitet 5.1 dhe 4.3 ballë lëkundën të premten kryeqytetin e Greqisë, duke shkaktuar panik mes banorëve.

Dy lëkundjet e fuqishme u ndjenë në mesditë rreth orës 14:15 dhe 15.10 me orën vendore, dhe tronditën nëntokën e Athinës në një thellësi 12 kilometra.

Epiqendra ishte veriperëndimi i kryeqytetit, ndërsa paslëkundjet që zgjatën disa minuta detyruan shumë qytetarë të dilnin nga ndërtesat.

Disa prej godinave raportohet se kanë marrë të çara, por fatmirësisht nuk ka dëme në njerëz.

Tërmeti u pasua me ndërprerje të përkohshme të energjisë elektrike në disa rajone të kryeqytetit, ndërsa mbingarkesa e linjave të telefonit vështirësoi punën e kompanive të telekomunikacionit.

Helikopterë dhe forca zjarrfikëse po patrullojnë zonat në mënyrë të koordinuar për të vlerësuar pasojat.

Një tërmet i ngjashëm me fuqi 6 ballë, 20 vite më parë u mori jetën mbi 140 personave, plagosi 1,600 të tjerë dhe shkaktoi miliarda dollarë dëme financiare.