Pas vëzhgimit të kryer në plazhin e Durrësit, emisioni investigativ "BOOM" ishte këtë të martë (7korrik) në Velipojë dhe Shëngjin për të parë nëse respektohen masat anticovid bazuar në protokollet e Ministrisë së Shëndetësisë.

Manastirliu në Facebook me foto: Nuk mundemi të tolerojmë neglizhencën! Nuk mundemi dot të bëjmë një sy qorr dhe një vesh shurdh, kur shohim që masat nuk zbatohen në një biznes, ku ata të cilët shërbejnë nuk mbajnë maskë!Do të shtojmë grupet e inspektimit dhe kontrollet në qytetet që konsiderohen vatra për arsye të numrit të të prekurve, por gjithashtu për gjatë gjithë bregdetit do të vijojmë me kapacitete të shtuara sa i përket verifikimit të protokolleve dhe masave dhe nuk do të ketë asnjë tolerancë për të gjithë ata të cilët nuk zbatojnë rregullat!

Por situata në këto plazhet paraqitet më ndryshe nga sa shfaqen në ekranet e ministres.

Me sy shihet se distancat përgjithësisht nuk respektohen në stacionet e plazhit.  Shezlongët janë afër me njeri-tjetrin. Pushuesit qëndrojnë grumbull.

Në intervista për "BOOM" qytetarët shprehen se në përgjithësi nuk respektohet asnjë masë. Por a respektohen këto masa nga personeli që shërben në stacionet e plazheve?

"BOOM" regjistroi si në Velipojë ashtu edhe në Shëngjin personelin që shërben në stacionet e plazhit.

Ata nuk mbajnë as maska e as doreza. Madje pranojnë se duhet t’i vendosin, por se nuk i zbatojnë këto masa.  Kur i kërkojmë protokollin, thonë se nuk e kanë. Protokolli, duhet të ishte i afishuar në stacionin përkatës.

Mbajtja e maskës dhe e dorezave është kusht themelor në protokollin e firmosur nga ministritë për këtë sezon.

Gazetari: Kemi frikë.Duhet të jeni me maska.

Punonjësi: Po çfarë frike mor burrë? Ku ka shqiptari frikë?

Gazetari: Kanë ardhur institucionet të thonë të zbatoni këto rregulla?

Punonjësi: Kanë ardhur.Mos besoni se cfarë thotë tv.U kanë dhënë lekë për t’u regjistruar të thonë se janë me korona virus.

Gazetari: Ku i ke dorezat, maskën?

Punonjësi: Aty te çadra i kam lënë.

Por "BOOM" kemi vënë re një sërë problematikash të tjera. Tualetet publike janë jashtë çdo kushti.

Në qendrën shëndetësore të Velipojës mjekja nuk mban as maskë e as dorezë. Patrullat e policisë në plazh nuk mbajnë maska e doreza.

Kullat e vrojtimit janë pa vrojtues. Deti në brendësi është pa sinjalitikën e sigurisë.

Dushet janë pa funksion. Nuk kanë ujë dhe as sapun e xhel dezinfektues.

boom_rasti

/Ora News.tv/