Apollon Baçe sjell studime për arkitekturën dhe qytetet ilire
Akademiku Apollon Baçe ka sjellë për lexuesin shqiptar dy vepra me studime për arkitekturën dhe qytetet e popullit ilir. Për autorin në të gjendet dinjiteti i munguar i popullit shqiptar.
Kushtuar arkitekturës dhe qyteteve ilire, akademiku Apollon Baçe ka sjellë për lexuesit shqiptarë 2 vepra arkeologjike.
“Arkitektura në Iliri” dhe “Qytetet dhe qytezat ilire dhe në Iliri” paraqesin fakte të pakundërshtueshme për popullin shqiptar. Në to, thotë Baçe, gjendet dinjiteti i popullit tonë.
Baçe: Besoj se do të gjejnë atë gjë që na mungon, dinjitetin e kombit tonë. Ne si popull mesdhetar kemi nivelin më të lartë të adrenalinës së mundshme dhe kemi dy komplekse, ose maksimumi-jemi gjithçka, ose minimumi-nuk jemi asgjë. Por në këtë kohë, arkitektura dhe arti te ne ka qenë i nivelit të përparuar botëror.
Pavarësisht promovimit në të njëjtën ditë, dy veprat e Baçes ndahen nga njëri-tjetri, pasi në njërin trajtohet arkitektura e lashtë ilire, dhe tjetri është një biografi e 500 qyteteve ilire.
Baçe: I pari është një vështrim për arkitekturën, i dyti është volumi i parë i një serie që vazhdon në tërë qytetet ilire.
I pranishëm në ceremoninë e promovimit të librave ishte dhe kryetari i Akademisë së Shkencave Skënder Gjinushi, i cili u shpreh se synon që të shtojë bashkëpunimin midis institucionit që ai drejton dhe Fakultetit të Ndërtimit.