Vijon fenomeni “Dritan Dajti”, avokati e braktis, shtyhet gjyqi
27/02/2013, 17:05
Përditesuar: 27/02/2013, 17:05

Avokatët e kanë braktisur përsëri Dritan Dajtin në sallën e gjyqit.

Në seancën e 204 të këtij gjyqi unik për drejtësinë shqiptare, përsëri avokatët nuk marrin përsipër mbrojtjen e personit që akuzohet për vrasjen e 4 policëve. Avokatët e caktuar në seancën paraardhëse i kanë dërguar gjykatës edhe arsyet se përse nuk mund ta mbrojnë Dritan Dajtin.

Hasaf Haderaj, njëri nga mbrojtësit ka munguar për shak se nuk ndodhet në Shqipëri, ndërsa Vasil Shëngjergji i zgjedhur nga komisioni i ndihmës juridike pranë Ministrisë së Drejtësisë, kishte dërguar një deklaratë gjykatës se nuk kishte njohuritë e duhura penale për të mbrojtur Dritan Dajtin.

Këtë të Premte, pritet të mblidhet për çështjen  “Dajti”, Komiteti Disiplinor, sipas ligjit të ri të avokatisë, ku përfaqësues nga gjykata për të shqyrtuar kërkesat për proçedim disiplinor, do të jetë gjyqtari i krimeve te rënda, Dritan Hallunaj. Në total, në seancën gjyqësore ndaj Dritan Dajtit, nën akuzën për vrasjen e policëve në 2009-n, Gjykata e Krimeve të Rënda raportohet që ka kërkuar nga Dhoma e Avokatisë, 49 proçedime disiplinore në total, për avokatët ku për asnjërin prej tyre ende nuk ka një masë.

Proçesi gjyqsor ndaj Dritan Dajtit, shënon një rekord shtyrjes për drejtësinë shqiptare, ku këtë të Mërkurë u shënua seanca e 204 e dështuar, ku problem kyç për mbarëvajtjen e gjyqit është bërë mungesa e avokatëve.

Të parët për lajmin e fundit. Ndiqni Oranews.tvFacebook dhe në Twitter

Komento