Konsultimet - Plani i ri urbanistik i Tiranës, për një qytet me 1. 6 milionë në 2030
26/12/2016 - 13:11

Një plan urbanistik që i përshtatet ndryshimit demografik dhe që projekton Tiranën e së ardhmes, ashtu si modeli i kryeqyteteve europiane. Kështu u shpreh kryebashkiaku Erion Veliaj në takimin me anëtarët e Këshillit Bashkiak, të cilëve iu kërkoi të lënë bindjet politike dhe të fokusohen tek plani teknik. Plani do të kalojë për miratim në mbledhjen e Këshillit Bashkiak në 29 dhjetor.

Në fjalën përshëndetëse, Kryebashkiaku Veliaj tha se Tirana e viteve të ardhshme sipas këtij plani do të jetë ajo e një kryeqyteti modern europian.

“Ky është një qytet që ngrihet në këmbë dhe që është elastk. Pavarësisht situatave që kanë ndodhur, besoj që viti i fundit ka qenë një vit që Tirana është ringritur. Është larg ambicies tonë, por megjithatë shpresoj që ky plan me gjithë amendimet që ne mund të bëjmë dhe me të gjithë shtesat, kur ky plan të hyjë në fuqi, do të fillojë të realizohet ambicia jon ë për një qytet europian. Minimalisht secili prej nesh, nëse ishte Kryetari i Bashkisë, anëtar i Këshillit Bashkiak, të ketë mundësi të thotë që sa isha unë në atë detyrë, dhashë kontributin tim maksimal për një Tiranë shumë më dinjitoze sesa ajo që gjetëm”, tha Veliaj. Ai shtoi se është bërë një punë e jashtëzakonshme me këtë projekt i cili merr parasysh të gjitha zhvillimet demografike që ka pësuar dhe që pritet të pësojë kryeqyteti në të ardhmen.

“Vetëm ndryshimi demografik dhe gjeografik i Tiranës, qoftë si shtesë 30 % e popullsisë apo si rritje 25 herë e territorit, nënkupton që një pjesë nuk mund të vlejë për të tërën dhe Tirana urbane që ne kemi sot nuk vlen për të tërën. Ne kishim nevojë absolute për një plan të ri. Jo vetëm kaq. Plani i kaluar parashikonte një Tiranë të ngjeshur nga ana urbane që në 15-20 vitet e ardhshme parashikonte 4.5 milionë banorë. Kjo ne na u duk pak e paarsyeshme. Nuk mund të kemi një Shqipëri e gjysmë vetëm në Tiranë. Nuk i paragjykoj fare motivet, por besoj që i kemi dhënë planit një masë pak më njerëzore duke parashikuar një Tiranë që në vitin 2030 ka 1.5, 1.6 milionë banorë pra rreth 1/3 e popullsisë së Shqipërisë, por jo diçka jorealiste. Besoj që plani ka përmasa më njerëzore.

Sigurisht që plani është edhe një mishërim i një vizioni që ne kemi si anëtarë dhe përfaqësues të këtij qyteti, pavarësisht bindjeve tona politike. Ne duhet të vendosim a është një ide e mirë ideja e e pyllit obital? Unë besoj që po. Unë besoj që pavarësisht se çfarë secili lë në mandatin e vet, një pajë afatgjatë është diçka që siguron të ardhmen e një gjenerate tjetër”, tha Veliaj.

Veliaj tha se pjesë e planit është Tirana policentrike, ndërsa theksoi se do të ndërtohen sheshe dhe parqe publike edhe në lagjet periferike.

Kryebashkiaku u shpreh se Plani Urbanistik do të ketë impakt dhe në hapjen e shkollave të reja të cilat do të rrisin cilësinë e arsimimit të fëmijëve të kryeqytetit. Veliaj bëri thirrje që debati për Planin Urbanistik të Tiranës të fokusohet tek ai teknik dhe jo për të bërë politikë.

‘Çdo ditë në Tiranë në gjëndjen civile zhvendosen 50 vetë. Duam s’duam patjetër që do të përballemi. Uroj që dhe 60 bashkitë e tjera të kenë planifikuar si të mbajnë popullsinë e tyre të mos jetë Tirana e vetmja portë që do të duhet të menaxhojë të gjithë ambiciet e atyre që duhet të ecin përpara në jetë.

Ka shumë qytetarë që thonë nuk duam të vijnë më të tjerë në Tiranë, por ne nuk mund të vëmë doganë e traun në Tiranë, për sa raportet ekonomike janë të tilla kemi përdetyrë të planifikojmë një Tiranë të matur e të mençur e cila në vitet e ardhshme do vazhdojë të zgjerohet”

Kryetari i Bashkisë tha se për planin e përgjithshëm vendor janë bërë dëgjesa në të 24 njësitë.

Kryetari i Këshillit Bashkiak, Aldrin Dalipi u shpreh se ky plan urbanistik vjen pas konsultave të vazhdueshme me të gjithë ekspertët. Dalipi theksoi se ky plan urbanistik do të ndikojë në zhvillimin e Tiranës për vitet e ardhshme.

/Oranews.tv/

 

 

Të parët për lajmin e fundit. Ndiqni Oranews.tvFacebook dhe në Twitter

Read previous post:
Opposition front , DP and SMI demand the removal of the prime minister

Close