VKM - Qeveria miraton vendimin për legalizimin e shtesave pa leje
11/01/2017 - 17:47 Nga: Pranvera Bozhiqi

Rreth 1320 pallate do të përfitojnë lejet e legalizimit për shtesat anësore ose në lartësi  të cilat janë ndërtuar pa leje nga ndërtuesit e objekteve shumëkatëshe. Këshilli i Ministrave ka miratuar këtë projektvendim të hartuar nga ministria e zhvillimit urban i cili përcakton rregullat për legalizimin e këtyre objekteve.

Ministrja Eglantina Gjermeni në deklaratën e saj pas mbledhjes së qeverisë, tha se përfitues janë 26-30 mijë familje në të gjithë vendin.  Sipas saj qytetarët, të cilët kanë shlyer detyrimet e tyre financiare për banesat e blera,nuk mund të penalizohen prej këtyre ndërtuesve, të cilët nuk kanë respektuar rregullat apo detyrimet ligjore.

Gjermeni: Deri më sot janë kryer 110 mijë legalizime, 90 mijë vetëm në vitet 2014 – 2016, ose thënë ndryshe, 5 herë më shumë se në tetë vitet e qeverisjes së mëparshme. Në të gjithë vendin numërohen rreth 1 320 pallate që preken nga ky vendim, 700 prej të cilave janë në territorin në administrim të Bashkisë së Tiranës. Këto familje, edhe pse e kanë blerë pronën në mirëbesim, nuk janë bërë pronarë, për shkak të mospërmbushjes së detyrimeve ligjore nga ana e ndërtuesve.

Ky vendim i jep zgjidhje përfundimtare kësaj problematike të mbartur në vite, ku nga njëra anë rregullohet e drejta e regjistrimit të banesave nga individët që i kane blerë, dhe nga ana tjetër synohet vjelja e të gjitha detyrimeve financiare nga ndërtuesit dhe investitorët.

Ndërkohë për këtë vendim ministria e zhvillimit urban është kundërshtuar nga ministri i Drejtësisë Ylli Manjani, i cili argumentoi se nisma kishte përplasje e kompetencave të ALUZINIT me pushtetin vendor dhe mbart borxhet nga ndërtuesit tek blerësit. Manjani në shkresën e tij dërguar ministres Gjermeni shkruante se projekvendimi shkakton konflikt dhe nuk garanton kontrollin mbi territorin.

/Ora News/

 

Të parët për lajmin e fundit. Ndiqni Oranews.tvFacebook dhe në Twitter

Artikull i Rekomanduar:
Turqia varet nga Gjermania

Close