Dita e luleve në Shkodër, tre orë festime, këngë e piktura, pandemia nuk kufizoi shpirtin artistik të shkodranëve
Në qytetin e luleve, ajo që ka qenë muza për shumë artistë, as këtë vit nuk mungoi festa e 6 Majit, ditës kushtuar lules.
Pandemia i kufizoi festimet, por jo shpirtin artistik të shkodranëve që e duan të bukurën.
Zërat e bukur të fëmijëve dhuruan për mbi 3 orë një spektakël të veçantë, ku për të ardhur tek finalja e këtij aktiviteti është punuar për muaj të tërë.
"Për të 26 vit me radhë në ngjitemi në këtë skenë dhe i ofrojmë Shkodrës në çdo edicion zëra të bukur që nuk do t'i mungojnë edhe këtë radhë," tha Kujtim Alija, drejtor i qendrës kulturore të fëmijëve.
Të veçanta ishin edhe piktura e nxënësve të shkollës artistike Prenkë Jakova, ku kryefjalë e tyre ishin lulet.
"Janë shumë të rëndësishme lulet sidomos në botën e një artisti sepse një artist është shumë i lidhur me natyrën," tha një nxënëse.
"Është punuar rreth 1 muaj e gjysmë për të realizuar këto punime," tha Ilda Gjinaj, mësuese.
Për më të rriturit, nxënësit e Hamdi Bushatit të cilët dijet i marrin në fushën e turizmit, kjo ditë merr një rëndësi edhe më të madhe për vetë studimet që ato ndjekin.
"Sot në panair kemi prezantuar disa qëndisje që kanë të bëjnë me ditën e luleve, janë qëndisje të punuara me dorë," thotë një nxënëse.
Shkodra i ka thurur mbi 150 këngë luleve, ndërsa në oborret e shtëpive karakteristike janë simbol luleborat, karajfilat, jasemini etj.