Sëmundja e gjakut - Në një vit, 280 pacientë trajtohen nga sëmundja e hemofilisë në QSUT
17/04/2017 - 14:51 Nga: Manjola Hasa

 Në një vit, rreth 280 persona shtrohen në Qendrën Spitalore Universitare Nënë Tereza të prekur nga hemofilia. Kjo sëmundje vjen si pasojë e mpikjes së gjakut dhe shenjat e para të hemoragjisë shfaqen që në fëmijëri. Është një sëmundje e trashëgueshme dhe sipas mjekëve trajtimi përgjatë jetës është i nevojshëm në të kundër pasojat janë fatale.

Hemofilia është një çrregullim i koagulimit ose e mpikjes së gjakut, manifestuar me hemoragji në organizëm.

 Hemofilia është një sëmundje e trashëgueshme dhe shfaqet që në fëmijëri.

 Të dhënat në QSUT tregojnë se në vitin 2016, 280 pacientë u trajtuan në këtë spital, ndërsa nga muaji nëntor i 2016-deri në prill, QSUT-së i janë dretjuar 143 pacientë.

 Mjekja, Adela Perolla, shpjegon simptomat e shfaqjes së këtij çrregullimi.

Perolla: Hemofilia, A dhe B, janë pjesa madhore e këtij grupi patologjish. Këtu përballë kemi qendrën e Hemofilisë që është themeluar në 2017 dhe ka filluar të bëhet aktive nga nëntori i vitit të kaluar dhe deri më tani me një mjek të dedikuar aty.

48 është numri i fëmijëve të shtruar në këtë shërbim. Mjekët thonë se në 80% të rasteve pacientët i përkasin hemofilisë të tipit A.

Perolla: Duke qenë se është sëmundje e ç’rregullimit të gjakut këta pacientë paraqiten që në moshë të vogël me fenomene hemoragjike që mund të jenë në lëkurë, në mukoza dhe artikulacione gjë që i çon ata sëpari tek mjeku. Shkaku kryesor është sëmundje hereditare, e trashëguar që lidhet me kromozomin X, trashëgohet gjithmonë nga nëna tek djali. Janë meshkujt ata që preken me hemofili.

Mjekja hematologe shpjegon se një person që lind me hemofili do ta ketë këtë patologji gjatë gjithë jetës.

Trajtimi është i nevojshëm dhe nuk mund të shmanget. Një person që neglizhon këtë çrregullim të gjakut, mund të ketë pasoja fatale për jetë për shkak të hemoragjisë.

17 prilli është dita botërore e ndërgjegjësimit, ndaj mjekët rekomandojnë mosneglizhencë të simptomave.

Transmetimi

Hemofilia transmetohet nga prindërit te fëmijët nëpërmjet gjeneve. Gjenet përgjegjëse për hemofilinë A dhe B ndodhen në kromozomin X . Për këtë arsye, hemofilia quhet një sëmundje e lidhur me kromozomin X. Nëse në një çift, bashkëshorti është i sëmurë me hemofili dhe gruaja nuk është, atëherë asnjëri nga fëmijët nuk do të jetë i sëmurë me hemofili, por të gjitha vajzat e këtij çifti do të kenë gjenin bartës të sëmundjes. Femrat që kanë gjenin “defektoz” të hemofilisë, quhen bartëse. Nëse një burrë i shëndoshë martohet me një grua bartëse të sëmundjes, atëherë ata do të kenë 50 % mundësi për të lindur një djalë të sëmurë dhe 50 % mundësi për të lindur një vajzë bartëse të sëmundjes.

Si diagnostikohet

Hemofilia diagnostikohet nëpërmjet marrjes së një analize gjaku, e cila mat nivelin e faktorit të koagulimit në gjak. Nëse niveli i faktorit VIII është i ulur në gjak, kemi të bëjmë me hemofilinë A, dhe nëse kemi ulje të faktorit IX në gjak, kemi të bëjmë hemofilinë B. Nëse nëna ka histori familjare për persona me hemofili, atëherë bëhet diagnoza prenatale, nëpërmjet marrjes së gjakut fetal, rreth javës së 18-të të shtatzënisë.

 Shenjat

-Nxirje e lëkurës, hematoma

-Hemorragji në muskuj dhe artikulacione

-Hemorragji spontane

-Hemorragji e zgjatur pas prerjes, kirugjive, aksidenteve

-Dhimbje

-Ënjtje

-Ngurtësim, kufizim të lëvizjes

-Vështirësi për të lëvizur artikulacionin

/Oranews.tv/

 

Të parët për lajmin e fundit. Ndiqni Oranews.tvFacebook dhe në Twitter

Komento

Read previous post:
U kapën me 200 mijë paund kokainë, 20 vjet burg për tre shqiptarë

Close